ایٹمی قوت کو کوئی شکست نہیں دے سکتا یہ بات بھارت بھی جانتا ہے۔ رانا ثناءاللہ

?️ 20 اکتوبر 2025

اسلام آباد (سچ خبریں) وزیراعظم کے مشیر برائے سیاسی امور سینیٹر رانا ثناء اللہ نے فیصل آباد میں تقریب سے خطاب کرتے ہوئے کہا کہ ن لیگ نے ہمیشہ خدمت کی سیاست کی ہے، کبھی نفرت کی سیاست نہیں کی،ملک میں تمام کام ن لیگ کے دور حکومت میں ہوئے، آج پوری دنیا میں پاکستان کی عزت ایٹمی قوت کی وجہ سے ہے، ایٹمی قوت کو کوئی شکست نہیں دے سکتا یہ بات بھارت بھی جانتا ہے، میاں نواز شریف نے ایٹمی دھماکے کرکے پاکستان کو ایٹمی طاقت بنایا۔

تفصیلات کے مطابق رانا ثناءاللہ کا کہناتھا کہ پاکستان ایٹمی قوت بنا تو اس وقت تک لوڈشیڈنگ تھی نہ مہنگائی ،اس کے بعد 12 اکتوبر آیا جو 10 سال تک حکومت رہی، 2013 میں ہمیں دوبارہ منتخب کیا تو اس کے بعد نہ لوڈشیڈنگ رہی نہ دہشتگردی، اس کے بعد پھر 2018 میں دھاندلی کے ذریعے ایک پروجیکٹ لانچ ہوا، 2018 میں لوگ عزت کی روزی کما کر کھا رہے تھے، 4 سال میں دوبارہ ملک ڈیفالٹ ہونے کا شور شروع ہوگیا۔

انہوں نے کہا کہ آج دوبارہ پوری دنیا میں کوئی نہیں کہہ رہا کے ڈیفالٹ ہونے کا خطرہ ہے، معرکہ حق میں آپ کی حکومت اور عسکری قیادت نے اپنے سے 5 گنا بڑی معاشی اور 10 گنا بڑی فورس کو شکست دی، 78 سالوں میں 28 مئی 1998 اور 10 مئی 2025 کو جب مودی کا غرور مٹی میں ملایا، یہ دونوں مواقع ن لیگ کے دور میں نصیب ہوئے، ان لوگوں نے میرے خلاف وہ مقدمہ بنایا جس کی سزا موت تھی، ہم اس وقت بھی سیاسی معاملات ٹیبل پر بیٹھ کر حل کرنے کو تیار تھے، انہوں نے کہا میں تو نہیں چھوڑوں گا، ہم آج بھی کہتے ہیں سیاسی معاملات مل بیٹھ کر میثاق استحکام پاکستان کرتے ہیں۔

رانا ثناء اللہ نے کہا کہ یہ ملک میں سیاست اور ترقی نہیں بلکہ نفرت ، فتنہ اور انارکی چاہتے ہیں، ملک میں فتنہ اور فساد کی اجازت نہیں دے سکتے، جن کو 40 سال سے اجازت ملی ہوئی تھی انکو بھی چار روز قبل سبق سکھا دیا ہے، جو گمراہ ہو چکے ہیں انہیں دلیل سے سمجھائیں۔