اسلام آباد (سچ خبریں) وفاقی وزیر اطلاعات فواد چوہدری نے کہا کہ اگلے سات سال بھی یہ اپوزیشن والے ایسے ہی بینر اٹھا کر کونے میں کھڑے ملیں گے۔ مائیکروبلاگنگ ویب سائٹ ٹویٹر پر اپنے پیغام میں وفاقی وزیرِاطلاعات فواد چوہدری نے کہا کہ بجٹ کو ہر طبقہ فکر کے لوگوں نے سراہا اس سے اس بجٹ کی اہمیت بڑھ جاتی ہے، اپوزیشن کا رویہ حسب معمول غیرذمہ دارانہ رہا۔
انہوں نے کہا کہ اپوزیشن نے اب تک بجٹ پڑھنے کی بھی زحمت نہیں کی، ایسی غیرسنجیدہ اپوزیشن سے عوام کیا توقع کر سکتی ہے، یہ لوگ آئندہ 7 سال بھی ایسے ہی بینر اٹھا کر کونے میں کھڑی ملی گی۔
انہوں نے اپنے ایک بیان میں کہا کہ اپوزیشن جماعتوں نے بجٹ تقریر سنی نہیں، انہیں حکومت بجٹ کا پتہ تک نہیں اور یہ احتجاج کررہے ہیں۔
فواد چوہدری نے کہا کہ اپوزیشن بجٹ تقریر سن لیتی تو شاید احتجاج کی ضرورت پیش نہ آتی، اصل میں انہوں نے پہلے ہی ذہن بنا لیا تھا کہ شور شرابہ کرنا ہے۔ انہوں نے اپوزیشن کو مشورہ دیتے ہوئے کہا کہ وہ حکومتی بجٹ کا مطالعہ کرے، اس پر اپنی تجاویز دے اور ہمیں بتائے کہ وہ کیا چاہتی ہے۔ اُن کا کہنا تھا کہ بدقسمتی سے اپوزیشن کا ایک ہی مطالبہ ہے کہ ہمارے کیسز ختم کردیں، انہیں سمجھنا چاہئیے کہ یہ کیسز ہمارے ذاتی نہیں ہیں کہ ہم معاف کر دیں۔
وفاقی وزیر فواد چوہدری نے یہ بھی کہا کہ اپوزیشن جماعتیں عوام کا پیسہ واپس کر دیں تو کیسز ختم ہوجائیں گے۔ یاد رہے کہ گذشتہ روز وفاقی حکومت نے آئندہ مالی سال 22-2021ء کا بجٹ گذشتہ روز پیش کیا۔ بجٹ وفاقی وزیر خزانہ شوکت ترین نے گذشتہ روز اسپیکر اسد قیصر کی زیر صدارت قومی اسمبلی کے اجلاس میں پیش کیا۔ بجٹ تقریر کے دوران اپوزیشن نے احتجاج کرتے ہوئے خوب نعرے بازی کی اور ڈیسک بجا کر اپنا احتجاج ریکارڈ کروایا۔
