اسلام آباد: (سچ خبریں) الیکشن کمیشن نے قومی اور صوبائی اسمبلیوں کے انتخابات کے لیے سیاسی جماعتوں کے انتخابی نشانات الاٹ کر دیے، پاکستان تحریک انصاف (پی ٹی آئی) کو ’بلے‘ کا انتخابی نشان نہ ملنے کی وجہ سے پارٹی امیدوار آزاد حیثیت میں الیکشن میں حصہ لیں گے۔
’ڈان نیوز‘ کے مطابق تمام سیاسی جماعتوں کو انتخابی نشان الاٹ کردیے گئے ہیں، پاکستان پیپلزپارٹی پارلیمنٹیرین کو تیر، پاکستان مسلم لیگ (ن) کو شیر کا نشان الاٹ کیا گیا ہے، پاکستان تحریک انصاف (نظریاتی) کو بلے باز کا نشان الاٹ کیا گیا ہے۔
استحکام پاکستان پارٹی (آئی پی پی) کو عقاب کا نشان ملا ہے، متحدہ قومی موومنٹ (پاکستان) کو پتنگ کا نشان الاٹ کیا گیا ہے۔
جمعیت علمائے اسلام (ف) کو کتاب کا نشان الاٹ ہوا ہے، جماعت اسلامی پاکستان کو ترازو کا نشان ملا ہے۔
الیکشن کمیشن کی منظور کردہ فہرست میں نئی جماعت پاکستان تحریک انصاف پارلیمنٹیرینز کو پگڑی کا نشان الاٹ کیا گیا ہے۔
ریٹرننگ افسران انتخابی نشانات سمیت امیدواروں کی حتمی فہرستیں آج آویزاں کریں گے، الیکشن ایکٹ کے تحت الیکشن کمیشن حتمی فہرستیں ویب سائٹ پر اپلوڈ کرے گا۔
پی ٹی آئی کو ’بلا‘ نہ ملنے کی وجہ سے پارٹی امیدواروں کو آزاد حیثیت میں الیکشن لڑنے کے لیے مختلف انتخابی نشان الاٹ کیے گئے ہیں، آزاد امیدواروں کے لیے الیکشن کمیشن نے ایک 177 نشانات مخصوص کر رکھے ہیں۔
