روس نے کورونا وائرس کی جانچ کے لئے بائیو لوجیکل چپ تیار کر لی

?️ 31 جولائی 2021

ماسکو(سچ خبریں) روس نے کورونا وائرس سے ہونے والے انفیکشن کی جانچ کے لیے اہم قدم اٹھاتے ہوئے بائیو لوجیکل چپ تیار کر لی ہے روسی ماہرین نے اس بات پر زور دیا ہے کہ یہ چپ انسان کے جسم میں نہیں لگائی جائے گی بلکہ اس چپ کو صرف تجربہ گاہوں میں استعمال کیا جائے گا۔

تفصیلات کے مطابق روسی سائنس دانوں کی ایک ٹیم نے حیاتیاتی ڈی این اے چپ تیار کر لی ہے جو کورونا وائرس کی جانچ کو آسان بنا دے گی۔یہ انکشاف روسی کنزیومر پروٹیکشن ایجنسی کی ویب سائٹ پر کیا گیا ہے، جس میں بتایا گیا کہ روسی شہر نووگراڈ میں قائم وبائی امراض اور مائیکروبائیولوجی پر کام کرنے والے ایک انسٹیٹیوٹ نزنی (Nizhny) میں ایک پروٹو ٹائپ پر کام کیا جا رہا تھا تاکہ SARS-CoV Virus -2 کے اصل مرض یا مرض پیدا کرنے والے آرگینزم کی نشان دہی ہو سکے۔

واضح رہے کہ بائیو مارکر کی تیزی سے کھوج کے لیے ماہرین برسوں سے ملٹی میڈیا بائیو سینسرز کی تحقیق اور ڈیولپمنٹ میں مصروف ہیں، سائنس دان پیپٹائڈز کا استعمال کرتے ہوئے دل کے دورے، تناؤ اور کورونا وائرس کے بائیو مارکرز کی تشخیص کا بھی مطالعہ کر رہے ہیں۔

رپورٹ کے مطابق وائرلوجسٹس نے مرض کے اصل آرگینزم کی شناخت اور جانچ کے لیے سائنسی اور تکنیکی بنیادوں پر یہ چپ تیار کی ہے۔روسی ماہرین نے اس بات پر زور دیا ہے کہ یہ چپ انسان کے جسم میں نہیں لگائی جائے گی بلکہ اس چپ کو صرف تجربہ گاہوں میں استعمال کیا جائے گا تاکہ بائیو میٹریلز میں انفیکشن کی ڈگری کا تعین کیا جا سکے جو نمونوں سے حاصل کیے جاتے ہیں۔