امریکی انٹیلی جنس نے چین کو امریکا کے لیئے سب سے بڑا خطرہ قرار دے دیا

🗓️ 15 اپریل 2021

واشنگٹن (سچ خبریں) امریکی انٹیلی جنس نے چین کو امریکہ کے لیئے سب سے بڑا خطرہ قرار دیتے ہوئے کہا ہے کہ اس وقت چین کی بڑھتی ہوئی طاقت امریکا اور دنیا کے لیئے سب سے بڑا خطرہ ہے جس کا مقابلہ کرنا ضروری ہے۔

تفصیلات کے مطابق عالمی خطرے کی تشخیص کی سالانہ رپورٹ کے اجراء کے ایک دن بعد امریکی انٹیلی جنس حکام نے سینیٹ کو چین سے بڑھتی ہوئی کشیدگی سمیت امریکہ کو درپیش چیلینجز سئ متعلق آگاہ کیا۔

غیر ملکی خبررساں ادارے کے مطابق نیشنل انٹلیجنس کے ڈائریکٹر، ایورل ہینس نے سینیٹ کی سلیکٹ کمیٹی برائے انٹلیجنس کو بتایا کہ چین کی حیثیت امریکہ کے حریف کی سی ہے، اپنی بڑھتی ہوئی طاقت کو استعمال کرنے سمیت وہ اپنی آمرانہ حکومت کے حمایت کے لئے عالمی اصولوں کو کالعدم کرنے کے لئے کام کر رہا ہے۔

ایورل نے کہا کہ اگرچہ اس نے امریکا کے لئے ایک بہت بڑا چیلنج کھڑا کیا ہے تاہم اس کی اپنی معاشی، ماحولیاتی اور آبادیاتی کمزوریاں ہیں جو اس کی بالادستی حاصل کرنے کی صلاحیت کو مزید پیچیدہ کرسکتی ہیں۔

سی آئی اے کے ڈائریکٹر ولیم برنز نے سینیٹرز کو کہا کہ چین کے ساتھ ٹیکنالوجی کا مقابلہ مسابقت چینی کمیونسٹ پارٹی کے ساتھ ہماری دشمنی کا مرکز ہے۔

دوسری جانب ایف بی آئی کے ڈائریکٹر کرسٹوفر وری نے کہا کہ امریکی جدت، معاشی تحفظ اور جمہوریت کے لئے چین سے زیادہ سنگین خطرہ کوئی دوسرا ملک نہیں ہے۔