دنیا کے قدیم ترین فلسطینی قیدی کا آزادی کے بعد پہلا پیغام

سچ خبریں:دنیا کے قدیم ترین فلسطینی قیدی نائل البرغوثی نے اسرائیلی جیل سے آزادی کے بعد اپنے پہلے پیغام میں کہا کہ امت مسلمہ کا اتحاد اور فلسطین کی آزادی ہی بنیادی ہدف باقی رہے گا۔

الجزیرہ نیوز چینل کی رپورٹ کے مطابق دنیا کے قدیم ترین فلسطینی قیدی نائل البرغوثی کو قیدیوں کے تبادلے کے ساتویں مرحلے میں اس وقت آزاد کیا گیا جب فلسطینی مزاحمتی تحریک نے چار صیہونی فوجیوں کی لاشیں اسرائیل کے حوالے کیں۔

یہ بھی پڑھیں: 18 بار عمر قید کی سزا سنائے جانے والے فلسطینی قیدی کی منگنی کی کہانی

اپنے پیغام میں نائل البرغوثی نے ان تمام افراد کا شکریہ ادا کیا جنہوں نے ان کی رہائی کے لیے کوششیں کیں،- انہوں نے غزہ کے مجاہدین، خواتین، بچوں، بوڑھوں، اور قیادت کی قربانیوں کو خراج تحسین پیش کیا،انہوں نے کہا کہ وہ کبھی بھی اہلِ غزہ کی قربانیوں کا حق ادا نہیں کر سکتے۔

البرغوثی نے اپنی قید کے دوران غیر انسانی سلوک اور صیہونی جیلوں میں قیدیوں پر ہونے والے مظالم کا ذکر کرتے ہوئے کہا کہ اسرائیلی جیلوں میں فلسطینی قیدیوں پر بدترین تشدد کیا جاتا ہے۔

انہوں نے کہا کہ انہیں جسمانی اذیتیں دی گئیں، تیز دھار اشیاء سے حملے کیے گئے، اور ان کے جسمانی اعضا کو نقصان پہنچایا گیا جبکہ بہت سے فلسطینی قیدی ہڈیوں کی شکستگی اور شدید زخموں کا شکار ہوئے ہیں۔

البرغوثی نے مزید کہا کہ اسرائیلی قابض فوج فلسطینی اسیران کے ہاتھ پیر باندھ کر وحشیانہ سلوک کرتی ہے، جو ان کی اخلاقی پستی کو ظاہر کرتا ہے،فلسطینی عوام اپنے ملک کی آزادی کے لیے خون، جان اور قیادت کی قربانیاں دے رہے ہیں،یہ جدوجہد صرف قیدیوں کی رہائی کے لیے نہیں بلکہ فلسطین کی مکمل آزادی کے لیے ہے۔

البرغوثی نے فلسطینی شہداء کو یاد کرتے ہوئے کہا کہ فلسطین کی آزادی ہر مسلمان، ہر عرب، اور ہر آزاد انسان کی ذمہ داری ہے۔

انہوں نے کہا کہ مزاحمتی تحریک خاص طور پر حماس کے رہنماؤں اسماعیل ہنیہ اور یحییٰ السنوار نے اسرائیل کی جنگی مشینری کے خلاف اپنی قوت ثابت کر دی ہے۔

مزید پڑھیں: 6 سال قید تنہائی میں رہنے والے فلسطینی قیدی کی کہانی

انہوں نے کہا کہ ایک فلسطینی قیدی کی رہائی، ایک شہید بچے کے خون کے برابر نہیں، لیکن فلسطین کی آزادی کی راہ میں قربانیاں دینا ناگزیر ہے، جیسا کہ الجزائر، ویتنام اور دیگر اقوام نے اپنی آزادی کے لیے کیا۔