واشنگٹن (سچ خبریں) امریکا نے ویانا مذاکرات کے حوالے سے اہم بیان جاری کرتے ہوئے کہا ہے کہ کسی بھی مسئلے کا حل گفتگو اور سفارت کاری ہے لہٰذا وائٹ ہاوس سمجھتا ہے کہ ایران پر عائد پابندیوں کا خاتمہ ویانا مذاکرات کا اصلی ایجنڈا ہے۔
تفصیلات کے مطابق وائٹ ہاوس کی ترجمان نے کہا ہے کہ ایران پر عائد پابندیوں کا خاتمہ ویانا مذاکرات کا اصلی ایجنڈا ہے۔
روزانہ کی پریس بریفنگ کے دوران وائٹ ہاوس کی ترجمان جین ساکی نے کہا کہ ویانا میں ہم اپنے یورپی شرکا کے ساتھ تبادلہ خیال میں مصروف ہیں تاہم انہوں نے ایٹمی معاہدے کے بارے میں پہلے دور کے مذاکرات کے بارے میں کوئی رائے دینے سے گریز کیا۔
وائٹ ہاوس کی ترجمان نے مزید کہا کہ ہم سمجھتے ہیں کہ سفارت کاری ہی صحیح راستہ ہے اور یہ سب کے فائدے میں ہے۔
اس سوال کے جواب میں کہ ویانا میں منگل کو ہونے والے مذاکرات سے امریکہ کس حد تک راضی ہے کہا کہ یہ پہلے مذاکرات ہیں اور ہمیں دیکھنا ہوگا کہ ہماری مذاکراتی ٹیم اس بارے میں کیا کہتی ہے۔
یاد رہے کہ ویانا مذاکرات میں امریکی وفد نے شرکت کی کوشش کی تھی لیکن ایران کی مخالفت کی وجہ سے شریک نہیں ہوسکا ہے۔
واضح رہے کہ آسٹریا کے دارالحکومت میں امریکا کی عالمی جوہری معاہدے میں واپسی اور ایران پر عائد اقتصادی پابندیاں ختم کرنے کے لیے یورپی یونین کے توسط سے بالواسطہ مذاکرات کا آغاز ہوگیا ہے جس میں دونوں ممالک کے ساتھ جوہری معاہدے کے دیگر فریقین کے نمائندے بھی شامل ہیں۔
