نیتن یاہو کا عرب امارات دورہ منسوخ ہونے کے بارے میں سنسنی خیز انکشاف ہوگیا

?️ 19 مارچ 2021

تل ابیب (سچ خبریں) اسرائیلی ٹی وی چینل نے سنسنی خیز انکشاف کرتے ہوئے کہا ہے کہ متحدہ عرب امارات اور اسرائیل کے مابین اختلافات کی وجہ سے نیتن یاہو کا امارات دورہ منسوخ کیا گیا۔

تفصیلات کے مطابق جمعرات کو اسرائیلی ذرائع ابلاغ نے بتایا کہ اسرائیلی ریاست اور متحدہ عرب امارات کے مابین تعلقات میں تناؤ کی فضا قائم ہے، اسرائیل میں اماراتی سرمایہ کاری کی حد کے بارے میں اسرائیلی وزیر اعظم بنیامین نیتن یاہو کے بیانات کے بعد اماراتی قیادت کو شرمندگی ہوئی ہے۔

عبرانی چینل 12 نے اطلاع دی ہے کہ اماراتیوں نے نیتن یاہو کی طرف سے انتخابی مہم میں پروپیگنڈا کرنے والے مواد کے طور پر اماراتی سرمایہ کاری کے استعمال پر اپنی غیظ و غضب کا اظہار کیا تھا، امارات نے واضح‌کیا ہے کہ وہ اسرائیل میں ہونے والے انتخابات میں مداخلت نہیں کرے گا۔

ٹی وی رپورٹ کے مطابق امارات اور اسرائیل کے درمیان پائے جانے والے اختلافات نیتن یاہو کے دورہ ابوظبی کی منسوخی کا باعث بنے۔

خیال رہے کہ گذشتہ جمعرات کو نیتن یاہو ابوظبی کا دورہ کرنے والے تھے لیکن انہوں نے اسرائیل کے ایک فوجی ہیلی کاپٹر جو نیتن یاہو کو اردن کے ہوائی اڈے پر لے جارہا تھا کو اردن کی فضا میں داخلے کی اجازت نہ ملنے کے بعد ان کا یہ دورہ ملتوی ہوگیا تھا۔
چینل کے مطابق نیتن یاہو نے کچھ دن پہلے کہا تھا کہ متحدہ عرب امارات اسرائیلی معیشت میں تقریبا  40 ارب شیکل کی سرمایہ کاری کرے گا۔

اس بیان میں اماراتیوں کو مشتعل کردیا گیا تھا، امارات اس ڈیل کو خفیہ رکھنا چاہتا تھا مگر نیتن یاہو کے بیان نے سارا بھانڈا پھوڑ ڈالا۔