اسرائیل فلسطین کے بعد اردن کو نشانہ بنائے گا؛حماس کا انتباہ

?️ 19 فروری 2026

سچ خبریں:حماس کے سینئر رہنما باسم نعیم نے خبردار کیا ہے کہ اسرائیل فلسطینی علاقوں میں اپنی پالیسیوں کے بعد گریٹر اسرائیل منصوبے کے تحت اردن کو بھی نشانہ بنا سکتا ہے۔

الجزیرہ نیوز چینل کی رپورٹ کے مطابق حماس کے ایک سینئر رہنما نے اسرائیل کے عرب اور اسلامی ممالک سے متعلق منصوبوں پر خبردار کرتے ہوئے کہا ہے کہ فلسطین کے بعد اسرائیل کا اگلا ہدف اردن ہو سکتا ہے۔

یہ بھی پڑھیں:اسرائیل علاقے کی سلامتی کے لئے سب سے بڑا خطرہ ہے:عرب ممالک

رپورٹ کے مطابق، حماس کے رہنما باسم نعیم نے کہا کہ اسرائیل الحاق کے فیصلوں، آبادکاری کے پھیلاؤ اور فلسطینی زمینوں کی قانونی حیثیت کو تبدیل کر کے فلسطینی علاقوں میں جنگ کو اپنے حق میں موڑنے کے بعد اپنے گریٹر اسرائیل منصوبے کو آگے بڑھائے گا، جس میں اردن کو مرکزی حیثیت حاصل ہے۔

انہوں نے اردن میں بعض نوجوانوں کے خلاف عدالتی فیصلوں کا حوالہ دیتے ہوئے کہا کہ مزاحمت کی حمایت کے الزام میں اردنی نوجوانوں کو دس سال قید کی سزا دینا ایک ایسا معاملہ ہے جس پر سنجیدہ غور و فکر کی ضرورت ہے۔

حماس کے اس سینئر رہنما نے مزید کہا کہ صہیونی دشمن، جسے انہوں نے فاشسٹ قرار دیا، اپنے منصوبوں کو پوری سنجیدگی سے آگے بڑھا رہا ہے اور اس کے مقابلے میں نہ افراد، نہ گروہ اور نہ ہی حکومتیں مکمل طور پر محفوظ رہ سکتی ہیں۔

مزید پڑھیں:اردن اور اسرائیل کے درمیان بڑھتی کشیدگی

باسم نعیم نے اپنے بیان کے اختتام پر کہا کہ گرفتار کیے گئے نوجوانوں کا مقام عزت و احترام کا ہے اور وہ اس بات کے مستحق ہیں کہ انہیں عزت دی جائے، نہ کہ وہ جیل کی سلاخوں کے پیچھے اور اندھیری کوٹھڑیوں میں قید رہیں۔