بلوچستان: نوشکی میں پولیس موبائل پر فائرنگ، 4 اہل کار جاں بحق

?️ 23 مارچ 2025

نوشکی: (سچ خبریں) بلوچستان کے ضلع نوشکی کے علاقے غریب آباد میں پولیس موبائل پر فائرنگ سے 4 اہل کار جاں بحق ہوگئے۔

ڈان نیوز کے مطابق پولیس حکام نے بتایا ہے کہ نوشکی میں پولیس موبائل پر گشت کے دوران نامعلوم ملزمان کی جانب سے حملہ کیا گیا جس کے نتیجے میں 4 اہل کار جاں بحق ہوگئے۔

پولیس حکام کے مطابق جاں بحق اہل کاروں کی نعشیں ہسپتال منتقل کردی گئی ہیں۔

وزیراعلیٰ بلوچستان نے نوشکی میں پولیس موبائل پر فائرنگ سے اہل کاروں کی شہادت اور منگچر میں مزدوروں کے قتل کی شدید مذمت کرتے ہوئے حکام کو سخت کارروائی کا حکم جاری کیا۔

وزیراعلیٰ بلوچستان سرفراز بگٹی نے کہا کہ موبائل پر فائرنگ سے پولیس اہلکاروں کی شہادت اور منگچر میں 4 مزدوروں کا قتل وحشیانہ کارروائی ہے، پولیس اہلکاروں اور بےگناہ مزدوروں کا خون رائیگاں نہیں جائے گا۔

سرفراز بگٹی کا کہنا تھا کہ دہشت گردی کے ذمہ داروں کو کیفر کردار تک پہنچائیں گے، خون بہانے والوں کو بلوچستان میں چھپنے کی جگہ نہیں ملےگی۔

قبل ازیں، بلوچستان کے ضلع قلات کے علاقے منگچر میں نامعلوم افراد نے تعمیراتی کمپنی کے کیمپ پر فائرنگ کردی تھی جس کے نتیجے میں 4 مزدور جاں بحق ہو گئے تھے۔

ڈپٹی کمشنر قلات کیپٹن (ر) جمیل بلوچ نے واقعے کی تصدیق کرتے ہوئے بتایا کہ نامعلوم مسلح افراد نے قلات کے علاقے منگچر میں دوپہر تقریباً ڈھائی بجے فائرنگ کردی، جس کے نتیجے میں کیمپ میں موجود 4 مزدور جاں بحق ہوگئے جبکہ ایک مزدور معجزانہ طور پر محفوظ رہا۔

لیویز ذرائع کا کہنا تھا کہ جاں بحق ہونے والے مزدور ٹیوب ویل پر کام کررہے تھے، جاں بحق ہونے والے افراد کا تعلق پنجاب کے علاقے صادق آباد سے ہے۔