امریکہ کا فلسطین حامی یونیورسٹیوں کی مالی امداد روکنے کا منصوبہ؛ اینٹی بی ڈی ایس بل ایوان نمائندگان سے منظور

?️ 4 ستمبر 2026

سچ خبریں:امریکی ایوان نمائندگان نے اینٹی بی ڈی ایس ایکٹ منظور کرلیا، جس کے تحت اسرائیل کے خلاف اقتصادی یا تعلیمی بائیکاٹ میں شریک یونیورسٹیوں کو وفاقی مالی امداد سے محروم کیا جاسکتا ہے۔

امریکی ایوان نمائندگان نے اینٹی بی ڈی ایس ایکٹ کے نام سے پیش کیا گیا ایک بل منظور کرلیا ہے، جس کے تحت صہیونی حکومت کے خلاف اقتصادی یا تعلیمی بائیکاٹ میں حصہ لینے والے اعلیٰ تعلیمی اداروں کو وفاقی حکومت کی جانب سے فراہم کی جانے والی مالی امداد سے محروم کیا جاسکتا ہے۔

صیہونی اخبار یدیعوت احرونٹ کے مطابق یہ بل امریکی ایوان نمائندگان میں 237 ووٹوں کی حمایت اور 169 مخالفت میں منظور کیا گیا۔

جون میں ایوان نمائندگان کی تعلیمی کمیٹی سے منظوری حاصل کرنے کے بعد اب یہ بل قانون سازی کے اگلے مرحلے کے لیے امریکی سینیٹ کو بھیجا جائے گا۔

بل کی شقوں کے مطابق وہ یونیورسٹیوں اور اعلیٰ تعلیمی ادارے جو اسرائیل کے خلاف اقتصادی یا تعلیمی بائیکاٹ میں شریک ہوں گے، انہیں سرکاری مالی امداد سے محروم کیے جانے کا خطرہ لاحق ہوگا۔

امریکی ایوان نمائندگان کی تعلیمی کمیٹی کی ری پبلکن سربراہ ورجینیا فاکس نے صیہونی یونیورسٹیوں کے علمی بائیکاٹ کو یہود دشمنی قرار دیتے ہوئے بل کی حمایت کی۔ انہوں نے کہا کہ یہ دو جماعتی قانون اس بات پر زور دیتا ہے کہ بائیکاٹ کی شکل میں کھلی یہود دشمنی کی مہمات کو سول سوسائٹی کے کسی بھی حصے میں جگہ نہیں ملنی چاہیے۔

صیہونی حکومت کے مخالفین کو یہود دشمنی کا الزام دینے کا معاملہ ایسے وقت میں سامنے آیا ہے جب امریکی یہودی برادری کا ایک نمایاں حصہ فلسطین کی حمایت میں متعدد بار اجتماعات اور مظاہرے کرچکا ہے۔

یہ اقدام ایسے وقت میں کیا گیا ہے جب غزہ جنگ کے دوران امریکہ کی متعدد یونیورسٹیوں میں اسرائیل کے خلاف طلبہ کے احتجاج اور بائیکاٹ کی تحریکیں بڑے پیمانے پر پھیل گئیں۔ بعض تعلیمی اداروں اور طلبہ تنظیموں نے اسرائیل کے ساتھ مالی اور تعلیمی روابط ختم کرنے کا مطالبہ بھی کیا۔

ایوان نمائندگان سے بل کی منظوری امریکی قانون سازوں کی جانب سے اسرائیل کے خلاف بائیکاٹ، سرمایہ کاری سے دستبرداری اور پابندیوں کی تحریک کو محدود کرنے کی کوششوں میں ایک اور قدم قرار دی جارہی ہے۔ تاہم اسے قانون بننے کے لیے امریکی سینیٹ میں بھی قانون سازی کے مزید مراحل سے گزرنا ہوگا۔