الحشد الشعبی کو تحلیل کرنے کے بارے میں عراقی وزیراعظم کا بیان

سچ خبریں:عراق کے وزیراعظم محمد شیاع السوڈانی نے ایک بار پھر واضح کیا ہے کہ کسی بھی فریق کو یہ حق حاصل نہیں کہ وہ عراق پر دباؤ ڈال کر الحشد الشعبی (عوامی رضاکار فورس) کو تحلیل کروائے، ان کا کہنا تھا کہ الحشد الشعبی، عراق کی خودمختاری، سلامتی اور دہشتگردی کے خلاف دفاع کا ایک اہم ستون ہے۔

یہ بھی پڑھیں: ہتھیار کے بدلے الحشد الشعبی منحل کرنے کا مطالبہ،وجہ؟

الجزیرہ نیوز چینل کی رپورٹ کے مطابق عراق کے وزیراعظم السوڈانی نے کہا کہ امریکہ نے ہم سے کبھی الحشد الشعبی کو تحلیل کرنے کا مطالبہ نہیں کیا۔

انہوں نے مزید کہا کہ جب عراق میں امریکی اتحاد کا فوجی مشن مکمل ہو جائے گا، تب ملک میں موجود غیر ریاستی مسلح گروہوں کو منظم انداز میں ختم کیا جائے گا۔

قابل ذکر ہے کہ الحشد الشعبی نے داعش کے خلاف جنگ میں کلیدی کردار ادا کیا، اور عراق میں دہشتگردی کے خاتمے میں اہم فتوحات حاصل کیں، یہ فورس عراقی حکومت کے ماتحت ایک قانونی ادارہ ہے، جسے پارلیمنٹ نے باقاعدہ منظوری دی ہے۔

مزید پڑھیں: الحشد الشعبی عراق کی خودمختاری اور استحکام کی حامی

وزیراعظم السوڈانی کا یہ بیان ایسے وقت میں سامنے آیا ہے جب بعض مغربی حلقے عراق پر غیر ریاستی مسلح گروہوں کو تحلیل کرنے کے لیے دباؤ ڈال رہے ہیں،ان کا کہنا ہے کہ عراق ایک خودمختار ریاست ہے اور اپنے دفاعی ڈھانچے کا فیصلہ خود کرے گا، کسی بیرونی مداخلت کو قبول نہیں کیا جائے گا۔