اگر اسرائیل فلسطین میں کامیاب ہو گیا تو دوسرے ممالک بھی اس کے جرائم سے محفوظ نہیں رہیں گے:انصاراللہ

سچ خبریں:انصار اللہ یمن کے سربراہ سید عبدالملک بدرالدین الحوثی نے اسرائیل کی جارحیت اور عرب ممالک کے ساتھ اس کے بڑھتے تعلقات پر سخت ردعمل کا اظہار کرتے ہوئے کہا کہ اگر اسرائیل فلسطین پر مکمل کنٹرول حاصل کر لے تو وہ اپنی جارحیت دیگر مسلم ممالک تک پھیلا دے گا۔  

یہ بھی پڑھیں: غزہ پر صیہونی حکومت کے وحشیانہ حملوں پر ریاض اور دوحہ کا ردعمل

المسیرہ نیوز چینل کی رپورٹ کے مطابق انصار اللہ یمن کے سربراہ سید عبدالملک بدرالدین الحوثی نے کہا کہ امریکہ اور اسرائیل ایک ہی سکے کے دو رخ ہیں، جو دنیا بھر میں بدترین جنگی جرائم کے مرتکب ہو چکے ہیں۔

انہوں نے عرب ممالک پر تنقید کرتے ہوئے کہا کہ اسرائیل جیسی قابض اور نسل پرست ریاست کے ساتھ تعلقات قائم کرنا امت مسلمہ سے بڑی خیانت ہے،یہ جرم اور ننگ و عار کی بات ہے کہ کوئی عرب ملک اسرائیل جیسے سفاک دشمن کے ساتھ دوستی کرے۔

الحوثی نے خبردار کیا کہ اسرائیل محض فلسطین تک محدود نہیں رہے گا بلکہ وہ دیگر مسلم ممالک کو بھی اپنی جارحیت کا نشانہ بنائے گا۔

انصار اللہ کے سربراہ نے کہا کہ اسرائیل اور امریکہ کبھی کسی معاہدے کے پابند نہیں رہے اور جو ممالک ان کے ساتھ کسی معاہدے پر بھروسہ کرتے ہیں، انہیں دھوکہ دیا جائے گا۔

انہوں نے کہا کہ اسرائیل حماس پر دباؤ ڈال کر قیدیوں کے تبادلے کے معاہدے کو اپنے حق میں موڑنے کی کوشش کر رہا ہے، مگر حماس کبھی اپنی پوزیشن سے پیچھے نہیں ہٹے گی۔

الحوثی نے غزا میں جاری انسانی حقوق کی خلاف ورزیوں، شہریوں کے قتل عام اور غذائی محاصرے کو کھلی جارحیت قرار دیا اور کہا کہ عرب ممالک کا اس ظلم پر خاموش رہنا قابل مذمت ہے۔

انصار اللہ کے رہنما نے کہا کہ تمام مسلم ممالک پر فرض ہے کہ وہ اسرائیل کے خلاف اقتصادی اور سیاسی سطح پر سخت کارروائی کریں۔  مسلمانوں پر لازم ہے کہ وہ فلسطین کا دفاع کریں، ورنہ قیامت کے دن ان سے اس کا حساب لیا جائے گا۔

الحوثی نے کہا کہ اب اسرائیل اور امریکہ کے خلاف صرف آگ اور خون کی زبان میں بات ہوگی اور ہر سطح پر مزاحمت کو تیز کیا جائے گا۔

انہوں نے کہا کہ بعض عرب ممالک فلسطینی مزاحمت کو دہشت گرد قرار دینے کی سازش میں شریک ہیں، جبکہ حقیقت یہ ہے کہ فلسطینی عوام اپنی بقا کی جنگ لڑ رہے ہیں۔

مزید پڑھیں:غزہ جنگ کے دوبارہ شروع ہونے پر صہیونی خاندانوں کا خوفناک ردعمل

الحوثی نے امت مسلمہ سے اپیل کی کہ وہ سیاسی، اقتصادی، عسکری اور میڈیا کے محاذ پر اسرائیل کے خلاف متحد ہو جائے۔