قیدیوں کے تبادلے کے بارے میں حماس کا تازہ ترین موقف

سچ خبریں:فلسطینی اسلامی مزاحمتی تحریک حماس کے ترجمان نے کہا ہے کہ قیدیوں کے تبادلے کے عمل کو جاری رکھنا صیہونی حکومت کی دونوں فریقوں کے درمیان معاہدے کی شرائط پر پابندی سے مشروط ہے۔  

المسیرہ نیوز چینل کی ویب سائٹ کے مطابق حماس کے ترجمان عبداللطیف قانوع نے زور دے کر کہا کہ قیدیوں کے تبادلے کا ساتواں مرحلہ اس آپریشنل فریم ورک کے تحت کیا گیا ہے جسے فلسطینی مزاحمت نے قابض حکومت پر مسلط کیا ہے۔

یہ بھی پڑھیں:صہیونیوں کے پاس ہتھیار ڈالنے کے سوا کوئی چارہ نہیں: فلسطینی مزاحمتی گروپ

انہوں نے مزید کہا کہ مزاحمتی تحریک معاہدے پر عمل درآمد اور دشمن کو اپنے وعدوں پر پابند رکھنے کے لیے پرعزم ہے۔

قانوع نے زور دے کر کہا کہ قیدیوں کے تبادلے کا عمل جاری رکھنا صیہونی حکومت کی جانب سے معاہدے کی باقی شرائط اور انسانی پروٹوکولز پر عمل درآمد سے مشروط ہے۔

انہوں نے یہ بھی یاد دلایا کہ معاہدے کے پہلے مرحلے کے آغاز کو 33 دن گزر چکے ہیں، لیکن قابض حکومت نے ابھی تک اپنے تمام وعدوں کو مکمل طور پر پورا نہیں کیا ہے۔

حماس کے ترجمان نے غزہ کی صورتحال کو المناک قرار دیا اور ثالثوں سے مطالبہ کیا کہ وہ صیہونی حکومت پر دباؤ ڈالیں تاکہ وہ انسانی پروٹوکولز پر عمل درآمد، انسان دوستانہ امداد کی ترسیل اور بے گھر افراد کی بنیادی ضروریات کو پورا کرے۔

قانوع نے وسیع پیمانے پر قیدیوں کے تبادلے کے لیے حماس کی مکمل تیاری پر زور دیتے ہوئے کہا کہ یہ تبادلہ ایک جامع پیکج کے تحت ہونا چاہیے جس میں مستقل جنگ بندی، قابض فوج کی واپسی اور غزہ کی تعمیر نو شامل ہو۔

اسی سلسلے میں حازم قاسم نے کہا کہ آج فلسطینی قوم طوفان الاقصیٰ  کی لڑائی میں اپنی ایک بڑی کامیابی کو ریکارڈ کر رہی ہے، یہ کامیابی مزاحمت کی ثابت قدمی، قربانی اور بہادری کے ذریعے ایک وسیع پیمانے پر قیدیوں کے تبادلے کے عمل کو انجام دینے سے حاصل ہوئی ہے۔

انہوں نے کہا کہ آج قسام بریگیڈز اور مزاحمتی تحریک نے صیہونی حکومت کو مجبور کیا ہے کہ وہ قیدیوں کی رہائی کے معاملے میں اپنی سرخ لکیروں کو عبور کرے اور کئی رہنما مجاہدین قیدیوں کو رہا کرے۔

مزید پڑھیں:قیدیوں کے تبادلے کے لیے حماس کی سنجیدگی ظاہر ہوئی

حازم قاسم نے زور دے کر کہا کہ ہم آج قیدیوں کے تبادلے کے تمام مراحل کو مکمل کرنے کے اپنے عزم کی تصدیق کرتے ہیں اور دوسرے مرحلے میں ایک وسیع پیمانے پر تبادلے کے لیے اپنی تیاری کا اعلان کرتے ہیں، بشرطیکہ قابض حکومت مستقل جنگ بندی، غزہ سے انخلا اور ہمارے قیدیوں کو ان کی جیلوں سے رہا کرنے پر پابند رہے۔