جرمنی نے کورونا وائرس کے مدنظر ملک میں نئے حفاظتی قوانین بناکر نافذ کردیئے

🗓️ 25 اپریل 2021

برلن (سچ خبریں) جرمنی نے کورونا وائرس کے مدنظر ملک میں نئے حفاظتی قوانین بناکر نافذ کردیئے ہیں اور چانسلر انجیلا مرکل نے عوام سے اپیل کی ہے کہ اگرچہ یہ قوانین سخت ہیں لیکن لوگ ان قوانین پر سختی سے عمل کریں۔

تفصیلات کے مطابق جرمنی کی 16 ریاستوں نے کورونا وائرس کے تناظر میں لاک ڈاؤن میں سخت تبدیلیاں لانے پر اتفاق کرلیا ہے۔

موصولہ اطلاعات کے مطابق برلن میں نئے قواعد کا اطلاق کردیا گیا ہے اور رات 10بجے سے صبح 5 بجے تک کرفیو رہے گا، اس دوران اسکولوں، ڈے کیئر سینٹر، دکانوں اور تفریحی مراکز کو مزید محدود کردیا گیا ہے۔

کورونا وائرس سے حفاظتی قانون کے تحت مخصوص اقدامات کی فہرست جاری کی گئی ہے جس کی رو سے کسی علاقے میں 100 سے زائد کیس ہوجانے پر وہاں پابندیوں اور سخت لاک ڈاؤن کا اطلاق کردیا جائے گا۔

شہریوں کو تقریبات میں شرکت کی اجازت نہیں ہوگی اور جنازے میں 30 سے زیادہ افراد شریک نہیں ہوں گے، نیا لاک ڈاؤن 30 جون تک جاری رہے گا۔

ادھر چانسلر انجیلا مرکل نے اپنے بیان میں عوام سے اپیل کی ہے کہ وہ ملک میں نافذ کی جانے والی نئی پابندیوں کا احترام کریں، اپنے ہفتہ وار ریڈیو خطاب میں انہوں نے اعتراف کیا کہ نئے قواعدسخت ہیں۔