غرب اردن میں اسرائیلی فوج کی وحشیانہ کاروائی، درجنوں فلسطینی زخمی ہوگئے

🗓️ 5 جون 2021

غرب اردن (سچ خبریں) اسرائیلی فوج نے غرب اردن میں وحشیانہ کاروائی کرتے ہوئے درجنوں فلسطینیوں کو زخمی کردیا ہے جن میں سے متعدد افراد کی حالت تشویشناک ہے جنہیں ہسپتال منتقل کردیا گیا ہے۔

تفصیلات کے مطابق قابض اسرائیلی فوج نے غرب اردن کے شمالی شہر نابلس میں نہتے فلسطینیوں پر طاقت کا وحشیانہ استعمال کیا ہے جس کے نتیجے میں 20 فلسطینی شہری زخمی ہوگئے۔

موصولہ اطلاعات کے مطابق اسرائیلی فوج نے جنوبی نابلس میں جبل صبیح کے مقام پر فلسطینی شہریوں پر گولیوں کی بوچھاڑ کی۔

ہلال احمر فلسطین کے مطابق اسرائیلی فوج نے حملے میں 20 فلسطینی زخمی ہوئے ہیں، ان میں سے 18 فلسطینی براہ راست فائرنگ، 3 دھاتی گولیوں اور 2 لاٹھی چارج سے زخمی ہوئے۔

نابلس میں ہلال  احمر کے ڈایریکٹر ایمرجنسی سروس احمد جبریل نے بتایا کہ اسرائیلی فوج کی فائرنگ سے زخمی ہونے والے 10 فلسطینیوں کو فوری طبی امداد فراہم کی گئی، ان میں سے متعدد کی حالت تشویشناک ہے جنہیں اسپتال منتقل کردیا گیا ہے۔

کل جمعہ کو نماز جمعہ کے بعد فلسطینیوں کی بڑی تعداد نے جبل صبیح میں یہودی آبادکاری کے خلاف ریلی نکالی گئی جس میں بیتا، یتما، قبلان کے علاقوں اور مقامی عوامی مزاحمتی کمیٹیوں کے کارکنوں نے بڑی تعداد شرکت کی، اس موقعے پر قابض فوج نے فلسطینیوں کو منتشر کرنے کے لیے ان کے خلاف طاقت کا اندھا دھند استعمال کیا جس کے نتیجے میں کم سے کم بیس فلسطینی زخمی ہوگئے۔