صہیونیوں کے ہاتھوں غزہ میں درجنوں فلسطینی شہید و زخمی

?️ 25 ستمبر 2025

سچ خبریں:غزہ پر صہیونی جارحیت میں ایک بار پھر شدت آگئی ہے اور صبح سویرے سے اب تک فضائی و زمینی حملوں کے نتیجے میں درجنوں فلسطینی شہید اور زخمی ہو چکے ہیں۔

فلسطینی خبر رساں ایجنسی شهاب کی رپورٹ کے مطابق قابض صہیونی فوج نے رات بھر اور صبح کے اوقات میں غزہ شہر اور اس کے اطراف میں شدید بمباری کی، جس کا مقصد بڑی تعداد میں شہریوں کو بے گھر کر کے انہیں غزہ کے مرکز اور جنوب کی جانب ہجرت پر مجبور کرنا ہے۔

یہ بھی پڑھیں:صہیونی جارحیت میں اضافے کے درمیان غزہ شہر سے انخلاء کا حکم

رپورٹ کے مطابق صہیونی طیاروں نے ابو دحروج خاندان کے اس مکان کو نشانہ بنایا جہاں شمالی الزوایده کے علاقے میں بے گھر فلسطینی پناہ لیے ہوئے تھے، اس حملے میں کم از کم 11 افراد شہید اور متعدد زخمی ہوئے۔

اسی طرح خان یونس کے مغربی حصے میں اردنی اسپتال کے قریب وادی خاندان کے گھر پر بمباری کی گئی جس کے نتیجے میں 3 فلسطینی شہید اور کئی زخمی ہوئے۔

مزید برآں النصیرات کے کیمپ نمبر 2 میں ایک گھر کو صہیونی ہیلی کاپٹروں نے نشانہ بنایا جس سے کئی فلسطینی زخمی ہوئے،غزہ شہر کے محلہ التفاح میں یافا اسٹریٹ پر واقع ایک اور مکان کو بھی فضائی حملے کا نشانہ بنایا گیا۔

شدید حملوں کے سبب غزہ کی طبی صورتِ حال انتہائی سنگین ہو چکی ہے۔ خان یونس کے ناصر میڈیکل کمپلیکس میں مریض بچوں کو راہداریوں اور عارضی بستروں پر لٹایا جا رہا ہے۔

مزید پڑھیں:براہ راست نسل کشی کا جاری

بستروں کی شدید کمی اور شمالی غزہ سے بے گھر ہونے والے ہزاروں خاندانوں کی آمد نے اسپتال کو قریب المرگ کر دیا ہے، جب کہ ماہرین صحت نے ممکنہ انسانی المیے سے خبردار کیا ہے۔