اسرائیلی ریاست کی بے جا حمایت بند کی جائے، امریکی کانگریس کے درجنوں ارکان کا جو بائیڈن سے اہم مطالبہ

🗓️ 27 جون 2021

واشنگٹن (سچ خبریں) امریکی کانگریس کے درجنوں ارکان نے امریکی صدر جو بائیڈن سے اہم مطالبہ کرتے ہوئے کہا ہے کہ اسرائیلی ریاست کی بے جا حمایت کو بند کیا جانا چاہیئے۔

تفصیلات کے مطابق ڈیموکریٹک پارٹی سے وابستہ امریکی کانگریس کے 73 ارکان نے صدر جو بائیڈن کو ایک مراسلہ ارسال کیا ہے جس میں مطالبہ کیا گیا ہے کہ وہ ٹرمپ کی اسرائیل نواز پالیسیوں کو مسترد کرتے ہوئے اسرائیلی ریاست کی بے جا حمایت بند کریں۔

اسرائیل اخبارات یروشلم پوسٹ اور ٹائمز آف اسرائیل ویب سائٹ سمیت کئی دوسرے ذرائع ابلاغ نے امریکی کانگریس کے  دسیوں ارکان کے صدر جوبائیڈن کے نام مکتوب کا حوالہ دیا ہے۔

ذرائع ابلاغ کے مطابق امریکی کانگریس کے 73 ارکان نے صدر کے نام اس مکتوب پر دستخط کیے ہیں، ان میں امریکی ایوان نمائندگان اور سینیٹ میں قائدانہ عہدے پر فائزارکان بھی ہیں۔

اس خط میں صدر جو بائیڈن سے اپیل کی گئی ہے کہ وہ اسرائیل اور فلسطین تعلقات کے بارے میں ٹرمپ انتظامیہ کی دیرینہ، متعصبانہ امریکی پالیسی ترک کریں۔

مکتوب میں بائیڈن سے اسرائیلی بستیوں کو غیر قانونی اور مغربی کنارے کو مقبوضہ علاقہ قرار دینے کے لیے اقدامات کریں۔

خیال رہے کہ موجودہ امریکی صدر نے کہا ہے کہ وہ سابق صدر جوبائیڈن کے دو اقدامات القدس کو اسرائیل کو دارالحکومت تسلیم کرنے اور غرب اردن پر اسرائیلی خود مختاری کی حمایت سے دست بردار نہیں ہوں گے۔

مکتوب میں کہا گیا ہے کہ امریکی حکومت کو واضح کرنا چاہیے کہ  فلسیطن میں یہودی بستیاں بین الاقوامی قانون سے متصادم ہیں۔

خط میں یہ بھی مطالبہ کیا گیا ہے کہ متعلقہ سرکاری امریکی دستاویزات اور مواصلات میں مغربی کنارے اور غزہ کی پٹی کی حیثیت کی نشاندہی کی جائے۔