عباس ملیشیا کے ہاتھوں فلسطینی دانشور کا قتل، حماس نے فلسطینی اتھارٹی کے وزیر اعظم سے استعفے کا مطالبہ کردیا

🗓️ 26 جون 2021

غزہ (سچ خبریں)  عباس ملیشیا کے ہاتھوں فلسطینی دانشور نزار بنات کے قتل کے بعد جہاں فلسطین بھر میں شدید احتجاج جاری ہیں وہیں اب حماس نے فلسطینی اتھارٹی کے وزیر اعظم محمد اشتیہ سے استعفے کا مطالبہ کردیا ہے۔

تفصیلات کے مطابق فلسطین کی اسلامی تحریک مزاحمت حماس کے پارلیمانی بلاک اصلاح و تبدیلی نے فلسطینی اتھارٹی کے وزیر اعظم محمد اشتیہ سے استعفیٰ دینے اور آنے والے انتخابات تک مجلس قانون ساز کو فعال کرنے کا مطالبہ کیا ہے۔

موصولہ اطلاعات کے مطابق حماس کے پارلیمانی بورڈ کے جمعہ کے روز ہونے والے اجلاس میں عباس ملیشیا کے ہاتھوں فلسطینی دانشور نزار بنات کے قتل کی شدید الفاظ میں مذمت کرتے ہوئے ان کے قاتلوں کو کیفر کردار تک پہنچانے کا مطالبہ کیا۔

بیان میں کہا گیا ہے کہ نزار بنات کے قتل کے بعد ان کی پوسٹ مارٹم رپورٹ میں ثابت ہوگیا ہے کہ انہیں گرفتاری کے بعد بے دردی سے تشدد کا نشانہ بنا کر موت کے گھاٹ اتارا گیا ہے، اس مجرمانہ واقعے کے بعد محمد اشتیہ کو وزارت عظمیٰ کے عہدے پر فائز رہنے کا کوئی حق نہیں، قوم کسی صورت میں رام اللہ اتھارٹی کے نام نہاد سیکیورٹی اداروں کا یہ دعویٰ نہیں مانے گی کہ بنات طبیعی موت سے فوت ہوئے ہیں۔

پارلیمانی بلاک نے کہا کہ نزار بنات کا تشدد کے ذریعے قتل فلسطینی اتھارٹی کے چہرے پر بدنما داغ ہے، اس واقعے نےثابت کردیا ہے کہ فلسطینی اتھارٹی تنقید کرنے والے کسی بھی فلسطینی شہری کو ہمیشہ کے لیے خاموش کرنے کی خاطر اس طرح کے مجرمانہ ہتھکنڈوں کے استعمال کی ظالمانہ پالیسی پرعمل پیرا ہے۔

بیان میں کہا گیا ہے کہ نزار بنات کو قتل کرکے فلسطینی قوانین، اخلاقیات اور انسانی اصولوں کا جنازہ نکالا گیا۔