واشنگٹن (سچ خبریں) امریکی ریاست آئڈاہو میں واقع اسکول میں ایک طالبہ نے فائرنگ کردی جس کے نتیجے میں تین افراد زخمی ہوگئے ہیں۔
غیر ملکی خبررساں ادارے کے مطابق امریکا میں چھٹی جماعت کی ایک طالبہ نے اپنے اسکول بیگ سے اسلحہ نکال کر اندھا دھند فائرنگ شروع کردی جس کے نتیجے میں تین افراد زخمی ہوگئے۔
اسکول ٹیچر نے جرات کا مظاہرہ کرتے ہوئے بچی پر قابو پالیا جس کی وجہ سے دیگر افراد محفوظ رہے، زخمیوں کو فوری طور پر ہسپتال منتقل کردیا گیا ہے۔
مقامی پولیس افسر نے بتایا ہے کہ یہ بچی اس سے قبل بھی اسکول کے اندر اور باہر کئی مرتبہ فائرنگ کا ارتکاب کرچکی ہے۔
واضح رہے کہ امریکہ میں گن کلچر تشویشناک حد تک تقویت پاچکا ہے اور یہی سبب ہے کہ اس قسم کے واقعات روزانہ کا معمول بن گئے ہيں۔
گزشتہ سال کی نسبت رواں سال کے ابتدائی چند ماہ کے دوران اسطرح کے واقعات میں دوگنا اضافہ ہوا ہے، اس عرصے کے دوران فائرنگ کے 180 واقعات پیش آئے ہيں جن میں درجنوں افراد ہلاک ہوچکے ہیں۔
واضح رہے کہ امریکا میں اسلحہ کی خرید و فروخت پر کسی قسم کی پابندی نہیں ہے جس کی بناپر اس قسم کے واقعات معمول کا ایک واقعہ شمار ہوتے ہیں۔
امریکی عوامی اور سماجی حلقوں کی جانب سے ہتھیاروں کی خرید و فروخت پر پابندی کے مطالبات کے باوجود اسلحہ ساز کمپینوں اور حکومت میں ان کی لابنگ کے نتیجے میں امریکی کانگریس کوئی موثر اقدام کرنے کی توانائی سے اب تک قاصر رہی ہے۔
