2022 میں جاپانی طالب علموں کی خودکشی کا ریکارڈ قائم

🗓️ 26 مارچ 2023

سچ خبریں:جاپانی حکومت کے اعداد و شمار سے پتہ چلتا ہے کہ 2022 میں اس ملک میں ابتدائی، مڈل اور ہائی اسکول کے طلباء میں خودکشی کی تعداد 514 افراد کی غیر معمولی تعداد تک پہنچ گئی ہے۔

جاپان کی کیوڈو خبر رساں ایجنسی نے سرکاری اعدادوشمار کا حوالہ دیتے ہوئے بتایا ہے کہ 2020 میں 499 طلباء نے خودکشی کی، جس سے لگتا ہے کہ 2022 میں کورونا وبا کے نتیجے میں طلباء کی خودکشی کی تعداد میں اضافہ ہوا ہے۔

رپورٹ میں بتایا گیا کہ 2022 میں پرائمری اسکول کے 17 طلباء،مڈل اسکول کے 143 طلباء اور ہائی اسکول کے 354 طلباء نے اپنی زندگی کا خاتمہ کیا، خودکشی کی روک تھام کے اقدامات پر تحقیق کرنے والے جاپانی وزارت تعلیم کے ایک عہدیدار نے کہا کہ یہ اضافہ 2020 میں شروع ہونے والی کورونا وائرس کی وبائی بیماری کے طویل مدتی اثرات کی وجہ سے ہو سکتا ہے۔

یاد رہے کہ عمومی طور پر جاپان میں اس سال خودکشی کرنے والے افراد کی تعداد 874 واقعات کے اضافے سے 21 ہزار 881 افراد تک پہنچ گئی ہے جبکہ گزشتہ 13 سالوں میں پہلی مرتبہ مردوں کی خودکشی میں اضافہ ہوا ہے اور یہ تعداد 14 ہزار 746 تک پہنچ گئی ہے۔

یہ اعدادوشمار پچھلے سال (2021) کے مقابلے میں 807 کیسز کا اضافہ ظاہر کرتے ہیں، ان اعداد و شمار کے مطابق جاپانی خواتین میں خودکشی کے واقعات میں مسلسل تیسرے سال اضافہ ہوا جو 2022 میں گزشتہ سال کے مقابلے میں 67 کیسز کے اضافے کے ساتھ 7135 کیسز تک پہنچ گیا۔

چاپانی وزارت صحت، محنت اور بہبود کی جانب سے نیشنل مانیٹرنگ ایجنسی کی رپورٹس کی بنیاد پر مرتب کیے گئے اعدادوشمار سے پتہ چلتا ہے کہ خواتین اور مردوں میں صحت کی دیکھ بھال سے متعلق مسائل خودکشی کی عام وجہ ہیں، اس کے بعد خاندانی مسائل اور معاشی مسائل ہیں جبکہ بے روزگاری سے متعلق مسائل کو بھی 2968 خودکشیوں کی وجہ قرار دیا گیا ہے۔