نابلس کا محاصرہ ایک جرم ہے:حماس

🗓️ 25 اکتوبر 2022

سچ خبریں:فلسطین کی اسلامی مزاحمتی تحریک حماس نے مغربی کنارے کے محصور شہر نابلس کے رہائشیوں کے ساتھ یکجہتی پر زور دیا اور صیہونیوں کے خلاف مزاحمت کو مزید تیز کرنے کی تاکید کی۔

شہاب نیوز کی ویب سائٹ کے مطابق فلسطین کی اسلامی مزاحمتی تحریک حماس نے نابلس کے محصور باشندوں کے ساتھ یکجہتی کا اعلان کرتے ہوئے القدس شہر اور مسجد اقصیٰ کے دفاع میں مزاحمت کو تیز کرنے پر زور دیا، حماس نے اپنے بیان میں کہا ہے کہ نابلس، مغربی کنارے کے شہروں اور کیمپوں کے محاصرے کا جاری رکھنا صیہونیوں کا وسیع پیمانے پر جرم ہے جس سے انہیں فلسطینی عوام کی مزاحمت اور استقامت کے عزم کو شکست دینے میں کبھی کامیابی نہیں ملے گی۔

بیان میں کہا گیا ہے کہ نابلس کے محاصرے نے ایک بار پھر فلسطینی قوم کے استحکام اور بہادری کے مقابلہ میں قابض حکومت کے سکورٹی نظام کی ناکامی کو ظاہر کر دیا ہے، رپورٹ کے مطابق حماس کے بیان میں کہا گیا ہے کہ مغربی کنارے کے باشندوں کی بہادری ، یہاں کے مجاہدین اور انقلابی نوجوانوں نے ایک بار پھر ثابت کر دیا کہ ہمیں ایک قومی انتفاضہ کی ضرورت ہے جو مہاجرین کی وطن واپسی اور فلسطین کی آزادی کے لیے صیہونیوں کا مقابلہ کرنے پر ہماری قوم کے یقین کی علامت ہے۔

حماس نے اقوام متحدہ سے بھی مطالبہ کیا کہ وہ فلسطینی قوم،اس سرزمین کے مقدس مقامات کے خلاف صیہونی قابض حکومت کی جارحانہ پالیسیوں کی مذمت کرے اور مسئلہ فلسطین کے ساتھ انصاف نیز فلسطینی عوام کے آزادی اور واپسی کے حق کی حمایت کرنے کی ذمہ داری قبول کرے۔