جارحین کے ساتھ فوجی تصادم کا نیا دور مختلف ہوگا: محمد البخیتی

?️ 26 دسمبر 2022

سچ خبریں:     تحریک انصار اللہ کے سینیئررکن محمد البخیتی نے تصدیق کی ہے کہ صعدہ میں سعودیوں کا حالیہ جرم یمن کے سرحدی علاقوں میں سعودی عرب کی مسلسل جارحیت کے تناظر میں ہوا ہے۔

اس رپورٹ کے مطابق محمد البخیتی نے المیادین کے ساتھ گفتگو میں کہا ہے کہ عمانی وفد نے جارح ممالک کا پیغام صنعاء تک پہنچایا اور ملازمین کے حقوق کے حوالے سے صنعا کے مطالبات کو سنا۔

انہوں نے اشارہ کیا کہ جارح ممالک نے اب تک جو کچھ پیش کیا ہے وہ صنعاء کے مطالبات کو پورا نہیں کرسکا ہے اور یمنی ملازمین کو تنخواہوں کی ادائیگی کے حوالے سے جارح ممالک کا موقف ابھی تک واضح نہیں ہے۔ اس کے ساتھ ساتھ جارح ممالک بعض ملازمین کو تنخواہیں دینے کی پیشکش کرکے یمن کے اندرونی تنازعات کو ہوا دینے کے درپے ہیں۔

انصار اللہ کے اس سینیئر رکن نے جارح سعودی اتحاد کو مزید خبردار کرتے ہوئے کہا کہ اگر صنعاء کے جائز مطالبات تسلیم نہ کیے گئے تو یمنی فورسز محاصرے کا جواب دینے میں سست نہیں رہیں گی۔

اپنی تقریر کے ایک اور حصے میں سعودی اتحاد کے ساتھ فوجی کشیدگی کے ایک نئے دور کے آغاز کی پیشین گوئی کرتے ہوئے البخیتی نے اس بات پر زور دیا کہ مستقبل میں سعودیوں کے ساتھ کوئی بھی فوجی تصادم پچھلے دور سے مختلف ہو گا کیونکہ صنعا نے اپنے میزائل تیار کیے ہیں۔