مہینوں کی مخفی زندگی کے بعد وینزویلا کی اپوزیشن لیڈر ناروے میں دوبارہ منظرِ عام پر آگئیں

?️ 12 دسمبر 2025

مہینوں کی مخفی زندگی کے بعد وینزویلا کی اپوزیشن لیڈر ناروے میں دوبارہ منظرِ عام پر آگئیں

وینزویلا کی اپوزیشن رہنما ماریا کورینا ماچادو کئی ماہ تک خفیہ زندگی گزارنے کے بعد جمعرات کے روز ناروے میں اچانک نمودار ہوئیں۔ انہوں نے اوسلو میں اپنے قیام کی جگہ کی بالکونی پر آ کر پہلی بار اپنی واپسی کا اشارہ دیا۔

امریکی نیوز نیٹ ورک سی بی ایس کے مطابق ماچادو 9 جنوری 2025 سے غائب تھیں، جب انہیں کاراکاس میں اپنے حامیوں کے درمیان موجودگی کے دوران مختصراً حراست میں لیا گیا تھا۔ وہ بدھ کو اوسلو میں ایک ایوارڈ تقریب میں شرکت کرنا چاہتی تھیں جہاں عالمی رہنما اور ان کے اہلِ خانہ ان سے ملاقات کے منتظر تھے۔

رپورٹ کے مطابق ماچادو جزیرہ کوراساؤ کے راستے وینزویلا سے فرار ہوئیں، جو نیدرلینڈ کے زیرِ انتظام ہے اور وینزویلا کے شمال میں 64 کلومیٹر کے فاصلے پر واقع ہے۔ اس خفیہ منتقلی کی تفصیلات سب سے پہلے "وال اسٹریٹ جرنل” نے شائع کیں۔

نوبل ویب سائٹ پر جاری ایک آڈیو پیغام میں ماچادو نے بتایا کہ وہ ایوارڈ تقریب میں بروقت شرکت نہیں کر سکیں، تاہم "بہت سے لوگوں نے اپنی جان خطرے میں ڈال کر” انہیں اوسلو پہنچنے میں مدد فراہم کی۔

ناروے کی نوبل کمیٹی کے سربراہ یورگن واتنے فریدنس نے تقریب میں کہا ماریا کورینا ماچادو نے بھرپور کوشش کی کہ وہ آج یہاں موجود ہوں، اگرچہ وہ تقریب میں نہیں پہنچ سکیں گی، لیکن ہمیں یہ اعلان کرتے ہوئے خوشی ہے کہ وہ محفوظ ہیں اور اوسلو میں موجود ہوں گی۔”

گزشتہ ماہ وینزویلا کے اٹارنی جنرل نے فرانسیسی خبر رساں ایجنسی کو بتایا تھا کہ اگر ماچادو ایوارڈ لینے کے لیے ملک چھوڑیں گی تو انہیں "فراری” تصور کیا جائے گا۔