غزہ کے بیشتر معذور افراد امدادی آلات سے محروم ہو گئے:اونروا

?️ 16 اگست 2025

غزہ کے بیشتر معذور افراد امدادی آلات سے محروم ہو گئے:اونروا

اقوامِ متحدہ کی ریلیف اینڈ ورکس ایجنسی برائے فلسطینی پناہ گزین (اونروا) نے اپنی تازہ رپورٹ میں انکشاف کیا ہے کہ غزہ میں ۸۳ فیصد سے زائد معذور افراد اپنے امدادی آلات اور سہولتوں سے محروم ہو چکے ہیں، جس کے باعث ان کی روزمرہ زندگی اور بنیادی خدمات تک رسائی انتہائی مشکل ہو گئی ہے۔

اونروا کے مطابق معذور فلسطینی نہ صرف طبی دیکھ بھال اور آلاتِ امداد سے محروم ہیں بلکہ انہیں خوراک تک کی شدید قلت کا سامنا ہے۔ ادارے نے ایک بار پھر خبردار کیا ہے کہ انسانی بحران میں تیزی سے اضافہ ہو رہا ہے اور اس کا واحد حل فوری اور بڑے پیمانے پر امدادی سامان کی ترسیل ہے۔

بیان میں کہا گیا ہے کہ غزہ کی ضروریات پوری کرنے کے لیے روزانہ کم از کم ۵۰۰ سے ۶۰۰ ٹرکوں پر مشتمل امدادی سامان پہنچنا چاہیے، جبکہ اس وقت ہزاروں ٹرک غذا اور ادویات لے کر اردن اور مصر میں منتظر ہیں مگر اسرائیلی رکاوٹوں کے باعث داخل نہیں ہو پا رہے۔

اونروا نے واضح کیا کہ تمام گذرگاہوں کا کھلنا اور مسلسل انسانی امداد کی فراہمی قحط کے پھیلاؤ کو روکنے کا واحد راستہ ہے۔ رپورٹ کے مطابق غزہ میں پانچ میں سے ایک بچہ بدترین غذائی قلت کا شکار ہے اور بھوک کے باعث اموات میں اضافہ جاری ہے۔

ادارہ نے عالمی برادری سے فوری جنگ بندی اور دیرپا فائر بندی کے معاہدے کی اپیل کی تاکہ نہ صرف بھوک سے مرتے فلسطینی عوام کو ریلیف مل سکے بلکہ امدادی قافلوں کی مستقل رسائی بھی ممکن بنائی جا سکے۔

قابل ذکر ہے کہ ۷ اکتوبر ۲۰۲۳ کو اسرائیل نے غزہ پر جنگ مسلط کی تھی جس کے بعد سے یہ خطہ مسلسل محاصرے اور انسانی المیے سے دوچار ہے۔ اگرچہ جنوری ۲۰۲۵ میں ایک عارضی فائر بندی اور قیدیوں کے تبادلے پر معاہدہ ہوا تھا، تاہم مارچ ۲۰۲۵ میں اسرائیل نے دوبارہ اس معاہدے کی خلاف ورزی کرتے ہوئے حملے شروع کر دیے اور امدادی سامان کی بڑی مقدار کو داخلے سے روک دیا۔