اسرائیلی منصوبہ، قبلہ اول کو مسلمانوں سے خالی کرانا ہے

اسرائیلی منصوبہ، قبلہ اول کو مسلمانوں سے خالی کرانا ہے

مسجدالاقصی کے خطیب شیخ عکرمہ صبری نے خبردار کیا ہے کہ اسرائیلی قابض حکومت یہودی مذہبی تہواروں کا سہارا لے کر منظم انداز میں مسجدالاقصی پر اپنے حملے بڑھا رہی ہے اور تقسیمِ زمانی و مکانی کے منصوبے کے ذریعے اس مقدس مقام کو مسلمانوں سے خالی کرانے کی کوشش کر رہی ہے۔

فلسطین الان نیوز ویب سائٹ کے مطابق، شیخ صبری نے اپنے بیان میں کہا کہ قابض صہیونی حکومت منصوبہ بندی کے تحت مسجدالاقصی پر حملہ آور ہوتی ہے اور اپنے تہواروں کو بہانہ بنا کر ان اقدامات کو تیز کر دیتی ہے۔

انہوں نے واضح کیا کہ مسجدالاقصی صرف اور صرف مسلمانوں کا حق ہے، یہ حق قرآن کریم اور حکمِ الٰہی سے ثابت ہے، اور کسی غیرمسلم کو اس مقدس مقام پر کوئی حق حاصل نہیں۔

اپنی اپیل میں انہوں نے عالم اسلام پر زور دیا کہ وہ مسجدالاقصی میں اپنی موجودگی کو بڑھائیں اور صہیونی سازشوں کے مقابلے میں اس مقدس مقام کا دفاع کریں۔

شیخ صبری نے مزید کہا کہ اسرائیلی حکومت آزادی مذہب اور آزادی اظہار کے حوالے سے ڈکٹیٹرشپ مسلط کر رہی ہے، جبکہ دنیا کے سامنے خود کو جمہوری ظاہر کرتی ہے۔