غزہ میں اسرائیلی فضائی حملے جاری، رہائشی برج المشتهی مکمل طور پر تباہ

غزہ میں اسرائیلی فضائی حملے جاری، رہائشی برج المشتهی مکمل طور پر تباہ

 الجزیرہ ٹی وی کے مطابق اسرائیلی فضائیہ نے غزہ شہر پر ایک نئی اور شدید فضائی یلغار کی ہے، جس کا خاص ہدف مغربی غزہ میں واقع رہائشی عمارت برج المشتهی تھا۔

ابتدائی مرحلے میں اسرائیلی جنگی طیاروں نے جمعے کے روز اس بلند عمارت کی کئی منزلوں کو نشانہ بنایا لیکن عمارت مکمل طور پر تباہ نہ ہو سکی۔ تاہم بعد میں کئے گئے مسلسل حملوں کے نتیجے میں یہ عمارت مکمل طور پر زمین بوس کر دی گئی۔

اسرائیلی فوج نے دعویٰ کیا ہے کہ یہ رہائشی برج حماس کی سرگرمیوں کے لیے استعمال ہوتا تھا اور یہاں سے اسرائیلی افواج کے خلاف کارروائیوں کی منصوبہ بندی کی جاتی تھی۔ فوج کا کہنا ہے کہ عمارت میں حماس کا عسکری سامان بھی موجود تھا۔

دوسری جانب برج المشتهی کی انتظامیہ نے ان الزامات کو سختی سے مسترد کرتے ہوئے کہا ہے کہ یہ صرف ایک رہائشی عمارت تھی جہاں بے گھر فلسطینی خاندان پناہ لیے ہوئے تھے، اور اس میں کسی قسم کی عسکری سرگرمیاں نہیں کی جا رہی تھیں۔اطلاعات کے مطابق مغربی غزہ کے علاقے انصار میں ہونے والے ان حملوں کے دوران متعدد فلسطینی زخمی بھی ہوئے۔

علاوہ ازیں اسرائیلی فوجی ریڈیو نے رپورٹ دی ہے کہ فوجی کمان کی جانب سے غزہ شہر کے مرکز میں واقع ایک اور عمارت کو خالی کرنے کا حکم جاری کیا گیا ہے، جو فلسطین اسٹیڈیم اور فلسطین اسکوائر کے قریب واقع ہے۔