سچ خبریں:عرب وزرائے خارجہ نے بیروت میں ہونے والی نشست میں عرب دنیا سے متعلق بعض امور پر تبادلہ خیال کیا۔
لبنانی خبر رساں ایجنسی این این اے کی رپورٹ کے مطابق عرب وزرائے خارجہ نے بیروت میں ایک مشاورتی اجلاس منعقد کیا جس کے دوران انہوں نے لبنان اور مسئلہ فلسطین کی حمایت اور یکجہتی پر زور دیا، لبنان کے وزیر خارجہ عبداللہ بوحبیب، جن کا ملک عرب وزرائے خارجہ کی کونسل کا گردشی چیئرمین ہے، نے اس اجلاس کی افتتاحی صدارت کی۔
رپورٹ کے مطابق اس سلسلے میں عرب لیگ کے ڈپٹی سکریٹری جنرل حسام ذکی نے کہا ہے کہ اس اجلاس میں الجزائر میں عرب سربراہی اجلاس کے انعقاد کی تیاریوں،صومالیہ میں بھوک کے سائے میں تباہ کن صورتحال پر غور کیا گیا اور عرب دنیا کی سنگین آب و ہوا نیز خوراک کی حفاظت کا جائزہ لیا گیا، ان کے مطابق اس اجلاس میں مسئلہ فلسطین پر بھی تبادلہ خیال کیا گیا اور لبنان کی حمایت اور یکجہتی پر زور دیا گیا۔
واضح رہے کہ اس اجلاس کے شرکاء نے ان معاملات پر بھی تبادلہ خیال کیا جو الجزائر میں ہونے والے عرب سربراہی اجلاس میں اٹھائے جانے والے ہیں، فلسطینی وزیر خارجہ ریاض المالکی نے بھی کہا کہ فلسطین کی صورتحال تشویشناک ہے اور عرب ممالک کو چاہیے کہ وہ فلسطین میں ہونے والے واقعات اور فلسطینیوں کے انسانی حقوق کی پامالی اور صیہونی عبوری حکومت کے جنگی جرائم نیز انسانیت کے خلاف جرائم پر توجہ دیں۔