عالمی برادری اسرائیل کو مغربی کنارے میں آباد کاری سے روکے:قطر

?️ 16 دسمبر 2025

عالمی برادری اسرائیل کو مغربی کنارے میں آباد کاری سے روکے:قطر

قطر کی وزارت خارجہ نے مغربی کنارے میں 19 نئی یہودی بستیوں کی تعمیر کی اسرائیلی منظوری کی شدید مذمت کرتے ہوئے عالمی برادری پر زور دیا ہے کہ وہ اپنی قانونی اور اخلاقی ذمہ داریاں پوری کرے اور اسرائیل کو مقبوضہ فلسطینی علاقوں میں آبادکاری کی پالیسی ختم کرنے کا پابند بنائے۔ قطری وزارت خارجہ نے ایک بیان میں کہا کہ اسرائیلی قبضہ گیر حکومت کی جانب سے مغربی کنارے میں نئی بستیوں کی منظوری بین الاقوامی قانونی قراردادوں کی کھلی خلاف ورزی ہے۔

بیان میں کہا گیا کہ عالمی برادری کو چاہیے کہ وہ خاموش تماشائی بننے کے بجائے عملی اقدامات کرے اور اسرائیل کو غیرقانونی آبادکاری روکنے پر مجبور کرے۔ قطر نے مسئلہ فلسطین کے حوالے سے اپنے مستقل مؤقف کا اعادہ کرتے ہوئے فلسطینی عوام کی جدوجہد اور استقامت کی حمایت کا اعلان کیا۔

اس سے قبل اسرائیلی وزیر خزانہ بزالل اسموتریچ نے مغربی کنارے میں 19 نئی بستیوں کو قانونی حیثیت دینے کا منصوبہ کابینہ کے سامنے پیش کیا تھا جسے منظور کر لیا گیا۔ اسرائیلی میڈیا کے مطابق ان میں سے بعض بستیاں بالکل نئی ہیں جبکہ کچھ کو اسرائیلی قوانین کے تحت باقاعدہ شکل دی جا رہی ہے۔ 1967 میں مغربی کنارے اور مقبوضہ القدس پر قبضے کے بعد اسرائیل ان علاقوں میں سیکڑوں یہودی بستیاں قائم کر چکا ہے۔ اقوام متحدہ متعدد بار ان آبادکاری منصوبوں کو غیرقانونی قرار دے چکا ہے، تاہم اس کے باوجود اسرائیل نے نہ صرف ان سرگرمیوں کو بند نہیں کیا بلکہ انہیں مزید تیز کر دیا ہے۔