امریکا میں پھر شٹ ڈاؤن ہو سکتا ہے 

?️ 16 دسمبر 2025

امریکا میں پھر شٹ ڈاؤن ہو سکتا ہے 

 امریکی سینیٹ میں صحت کی انشورنس سبسڈی میں توسیع پر ریپبلکنز اور ڈیموکریٹس کے درمیان اتفاقِ رائے نہ ہونے کے باعث امریکی حکومت کی ممکنہ دوبارہ بندش کے خدشات بڑھ گئے ہیں۔ یہ سبسڈیز جنوری میں ختم ہو رہی ہیں اور ان کی توسیع پر ناکامی نے دونوں جماعتوں کے سینیٹرز کو آئندہ سال ایک اور شٹ ڈاؤن کے لیے تشویش میں مبتلا کر دیا ہے۔

کانگریس سے منسلک امریکی میڈیا کے مطابق ڈیموکریٹس ریپبلکنز کے اس اقدام پر سخت ناراض ہیں جس کے تحت 2028 تک صحت انشورنس سبسڈی بڑھانے کی تجویز روکی گئی۔

ماضی میں حکومت 43 دن تک بند رہ چکی ہے اور اب مذاکرات کی ناکامی کے بعد ایک بار پھر ایسی صورتحال کا امکان ظاہر کیا جا رہا ہے۔ ڈیموکریٹ سینیٹر برنی سینڈرز نے اس فیصلے کو عوام کے ساتھ ناانصافی قرار دیا اور خبردار کیا کہ سبسڈی ختم ہونے سے لاکھوں امریکی صحت کی سہولتوں سے محروم ہو سکتے ہیں جبکہ کروڑوں افراد کے اخراجات میں نمایاں اضافہ ہوگا۔

اندازوں کے مطابق اگر کانگریس نے بروقت اقدام نہ کیا تو 2026 میں تقریباً 48 لاکھ افراد اپنی ہیلتھ کوریج کھو دیں گے اور نشورنس کمپنیاں اخراجات میں 26 فیصد تک اضافہ کر سکتی ہیں۔

ادھر سینیٹ میں بجٹ سے متعلق منی بس پیکج کی منظوری نہ ہونے کی صورت میں بھی حکومت کی بندش کا خطرہ موجود ہے۔ ریپبلکن سینیٹرز نے خبردار کیا ہے کہ اگر سالانہ بجٹ بلز جنوری 2026 تک لٹکے رہے تو ڈیموکریٹس دباؤ کے طور پر شٹ ڈاؤن کی حکمتِ عملی اپنا سکتے ہیں۔ دونوں جماعتوں کے بیانات سے واضح ہے کہ اگر بجٹ اور صحت سبسڈی پر جلد اتفاق نہ ہوا تو امریکہ ایک بار پھر حکومتی بندش کی طرف بڑھ سکتا ہے۔