سچ خبریں:صیہونی قابض حکومت کی انتظامیہ نے مقبوضہ بیت المقدس میں ایک ہسپتال کو تباہ کر دیا جس کےنتیجہ میں اس میں زیر علاج بیمار دربہ در ہوگئے۔
مرکز اطلاعات فلسطین کی رپورٹ کے مطابق قابض اسرائیلی انتظامیہ نے مقبوضہ بیت المقدس میں ایک ہسپتال مسمار کردیا،ہسپتال کی مسماری کے نتیجے میں اس میں زیرعلاج کئی مریض در بہ در ہوگئے جب کہ طبی عملے کو بھی مشکلات کا سامنا کرنا پڑا۔
مقامی فلسطینی ذرائع نے بتایا کہ منگل کو اسرائیلی پولیس اور فوج کی بھاری نفری نے جبل المکبر قائم ’عبداللہ الشیخ‘ ہسپتال کا گھیراؤ کیا اور بھاری مشینری کی مدد سے ہسپتال کو ملبے کے ڈھیر میں تبدیل کردیا گیا، درایں اثناقابض فوج نے شمالی بیت المقدس میں الرجبی نامی فلسطینی خاندان کا مکان بھی مسمار کردیا، یہ مکان بیت حنینا میں قائم تھا جس کی دو منزلیں تھیں اور اس میں یہ خاندان کئی سال سے رہ رہا تھا۔
واضح رہے کہ فلسطینیوں کے خلاف صیہونیوں کی بربریت دن بدن بڑھتی چلی جارہی ہے کبھی ان کے کھیت تباہ کیے جاتے ہیں ، کبھی مکان گرائے جاتے ہیں تو کبھی ہسپتال اور اسکولوں کو درندگی کا نشانہ بنایا جاتا ہے جبکہ فلسطینی مزاحمتی تحریک صیہونیوں کو کئی بار انتباہ دے چکی ہے کہ اپنی جارحیت بند کر دو ورنہ نتائج کے خود ذمہ دار ہوگے۔
ادھر مشرقی بیت المقدس میں الزعیم کے مقام پر اسرائیلی فوج نے فلسطینی اراضی پر دھاوا بولا اور قیمتی اراضی کی کھدائی کی۔
