مصر کا ایران کے ساتھ مذاکرات جاری رکھنے پر زور 

سچ خبریں:مصری وزیر خارجہ بدر عبدالعاطی نے جمعہ کے روز مشرق وسطیٰ کے لیے امریکی نمائندے اسٹیو وِٹکوف سے ٹیلی فونک رابطے کے دوران ایران کے ساتھ مذاکراتی عمل کو جاری رکھنے اور خطے میں کشیدگی بڑھنے سے بچنے پر زور دیا۔

مصری وزارت خارجہ کی طرف سے جاری کردہ بیان کے مطابق، دونوں رہنماؤں نے علاقائی پیش رفت، باہمی دلچسپی کے امور کے علاوہ ایران کے جوہری پروگرام سے متعلق واشنگٹن اور تہران کے درمیان مذاکرات کے حالیہ دور پر بھی تبادلہ خیال کیا۔

بیان میں کہا گیا ہے کہ عبدالعاطی نے اس ٹیلی فونک کال کے دوران مذاکرات کے ذریعے باقی ماندہ مسائل کے حل کے لیے کی جانے والی سفارتی کوششوں کے حوالے سے مصر کے مؤقف کی توثیق کی۔

انہوں نے مذاکراتی عمل کو جاری رکھنے اور علاقائی کشیدگی میں اضافے سے گریز کی اہمیت پر بھی روشنی ڈالی۔

عبدالعاطی نے ایسے متوازن حل تک پہنچنے کی ضرورت پر بھی زور دیا جو تمام فریقین کے مفادات کو پورا کر سکیں۔

واضح رہے کہ جمعرات کو سوئس شہر جنیوا نے عمان کی ثالثی میں ایران اور امریکہ کے درمیان جوہری مذاکرات کے تیسرے غیر براہ راست دور کی میزبانی کی تھی۔