صیہونی عزائم پورے خطے کے لیے خطرے کی گھنٹی:حماس کا انتباہ

سچ خبریں: تحریک مزاحمت حماس نے امریکی سفیر کے متنازعہ بیانات پر سخت ردعمل کا اظہار کرتے ہوئے خبردار کیا ہے کہ صیہونی منصوبے صرف فلسطین تک محدود نہیں ہیں بلکہ یہ پورے خطے کی سلامتی کے لیے ایک سنگین خطرہ ہیں۔

حماس نے ایک باضابطہ بیان میں مقبوضہ اراضی میں تعینات امریکی سفیر مائیک ہکابی کے ان بیانات کی شدید الفاظ میں مذمت کی، جس میں انہوں نے خطے کے خلاف صیہونی حکومت کی توسیع پسندانہ پالیسیوں کی کھل کر حمایت کی۔

بیان میں کہا گیا کہ ہکابی کے بیانات اس امریکی حمایت کی نقاب کشائی کرتے ہیں جو وہ اسرائیل کے استعماری منصوبوں کو دے رہی ہے۔ حماس کے مطابق یہ اقدام بین الاقوامی قوانین کی صریح خلاف ورزی، خطے کی خودمختاری اور عوام کے حقوق کی توہین ہے۔ اس قسم کے بیانات صیہونیوں کے استعماری عزائم کو مزید بے نقاب کرتے ہیں۔

حماس کے بیان میں مزید کہا گیا کہ عرب اور اسلامی ممالک کی سرزمین پر قبضے اور صیہونی حکومت کی توسیع پسندی کی امریکی سفیر کی حمایت، ان ممالک کی قومی سلامتی کے لیے براہ راست خطرہ ہے۔ بیان میں زور دیا گیا کہ یہ واقعی خطرے کی گھنٹی ہے، کیونکہ اسرائیل کا ہدف صرف فلسطین نہیں، بلکہ یہ حکومت پورے خطے کی جغرافیائی سلامتی کے لیے خطرہ ہے۔ حماس نے تمام عرب اور اسلامی ممالک پر زور دیا کہ وہ اس قسم کے بیانات کے خلاف متحد ہو کر سخت مؤقف اپنائیں۔

واضح رہے کہ مائیک ہکابی نے قبل ازیں یہ متنازعہ دعویٰ کیا تھا کہ صیہونی حکومت کو پورے مشرق وسطیٰ پر دریائے نیل سے لے کر دریائے فرات تک تسلط قائم کرنے کا حق حاصل ہے۔