صیہونی دشمن کے مقابلہ میں پورے عالم اسلام کا متحد ہونا ضروری ہے:ایران

?️ 2 مارچ 2022

سچ خبریں:ایران کے صدر نےشامی قومی سلامتی کونسل کے سربراہ کے ساتھ ملاقات میں کہا کہ صیہونی دشمن کا مقابلہ کرنے کے لیے سب اسلامی ممالک کا اتحاد لازمی ہے۔
ایرانی صدر کی خصوصی ویب سائٹ کے مطابق شام کی قومی سلامتی دفتر کے سربراہ علی مملوک نے صدر سید ابراہیم رئیسی سے ملاقات اور گفتگو کی، اس موقع پر ایران کے صدر نے کہا کہ علاقائی ممالک و اقوام کے خلاف سامراجی طاقتوں کی دشمنی کا سلسلہ بدستور جاری ہے جس کا مقابلہ کرنے کے لئے سبھی اسلامی ممالک کو متحد ہو کر کام کرنا ہوگا۔

انہوں نے دہشتگردی سے مقابلہ کرنے والے سورماؤں اور شہیدوں بالخصوص شہید قاسم سلیمانی کو یاد کیا اور عالمی دہشتگردی کے مقابلے شامی عوام کی بے مثال مزاحمت و استقامت کو سراہتے ہوئے شام کی ارضی سالمیت کے تحفظ اور اقتدار اعلیٰ کے احترام پر زور دیا۔

صدر ایران کا کہنا تھا کہ امریکہ شام میں اقتصادی اور سکیورٹی مشکلات کو ہوا دے کر اپنی موجودگی کو مختلف شکلوں میں آگے بڑھانے کے درپے ہے، ابراہیم رئیسی نے ایران و شام کے رشتوں کو اٹوٹ بندھن سے تعبیر کیا اور کہا کہ تہران و دمشق کے مابین ہمہ جہتی تعلقات استوار ہیں۔

اس موقع پر شام کے دفتر برائے قومی سلامتی کے سربراہ علی مملوک نے بھی اپنے ملک کے صدر بشار اسد کا سلام صدر ایران کو پہنچایا اور کہا کہ شامی عوام دہشتگردی کے خلاف جنگ میں ایران کے تعاون کو کبھی فراموش نہیں کریں گے۔