صیہونی دشمن صرف طاقت ہی کی زبان سمجھتا ہے:آیت اللہ خامنہ ای

🗓️ 12 مئی 2021

سچ خبریں:ایران کے مذہبی پیشوا آیت اللہ خامنہ ای نے طلبہ تنطیموں کو خطاب کرتے ہوئے افغانستان اور فلسطین میں پیش آنے والے تازہ ترین صورتحال کا ذکر کیا اور کہا کہ صیہونی دشمن کو طاقت کی زبان کے سوا کوئی زبان سمجھ میں نہیں آتی۔
اسلامی جمہوریہ ایران کے روحانی پیشوا اور اسلامی انقلاب کے رہبر آیت اللہ خامنہ ای نے طلبہ تنظمیوں کے ساتھ ویڈیو کانفرانس کے ذریعہ خطاب کیا جس میں آپ نے افغانستان اور فلسطین کے تازہ ترین اور انتہائی تلخ واقعات پر اپنے گہرے دکھ اور رنج کا اظہار کرتے ہوئے کہا کہ خدا کی لعنت ہو ان سفاک ترین افراد پر کہ جنہوں نے افغانستانی معصوم اور مظلوم بے گناہ غنچوں کو ٹکڑے ٹکڑے کردیا، خاک و خون میں نہلادیا اور ان بچيوں کو شہید کرکے وحشی پن کی حدوں کو عبور کرلیا۔

اس کے ساتھ ہی انھوں نے مسجد الاقصی ، قدس شریف اور فلسطین کے دیگر مقامات پر صیہونیوں کے ظالمانہ اقدامات کی طرف اشارہ کرتے ہوئے کہا کہ یہ غیرانسانی اقدامات دنیا والوں کی آنکھوں کے سامنے انجام پارہے ہیں، سب کو چاہیے کہ ان واقعات کی مذمت کرتے ہوئے اپنے فرائض پرعمل کریں۔

رہبر انقلاب اسلامی نے ملت فلسطین کی استقامت اور پائیداری کو خراج تحسین پیش کرتے ہوئے کہا کہ صہیونی طاقت کی زبان کے سوا کوئی دوسری زبان نہيں سمجھتے لہذا فلسطینیوں کو چاہیے کہ اپنی استقامت اور طاقت کو بڑھائيں تاکہ ان ظالموں کو گھٹنے ٹیکنے اور بربریت اور وحشی پن پر مبنی اقدامات ا نجام دینے سے روکا جاسکے۔