صیہونی اقدامات کا مقصد مغربی کنارے کو  خطر ناک صورتحال کی طرف لے جانا ہے

صیہونی اقدامات کا مقصد مغربی کنارے کو  خطر ناک صورتحال کی طرف لے جانا ہے

 فلسطینی وزارتِ خارجہ نے خبردار کیا ہے کہ صیہونی افواج کے بڑھتے ہوئے پرتشدد اقدامات خاص طور پر طولکرم اور دیگر علاقوں میں، خطے کو شدید کشیدگی اور دھماکہ خیز صورتحال کی طرف دھکیل رہے ہیں۔ وزارت نے عالمی برادری پر زور دیا ہے کہ وہ فوری طور پر اسرائیلی جارحیت کو روکنے اور فلسطینی عوام کے تحفظ کے لیے عملی کردار ادا کرے۔

فلسطینی وزارتِ خارجہ کی جانب سے جمعے کو جاری بیان میں کہا گیا ہے کہ قابض افواج کی پالیسی دراصل ایک منظم منصوبے کا حصہ ہے جس کا مقصد مغربی کنارے کی صورتحال کو مزید خراب کرنا، غیر قانونی بستیوں میں توسیع اور فلسطینی باشندوں کو بے گھر کرنا ہے۔

بیان میں مزید کہا گیا کہ عالمی برادری کی غفلت اور مؤثر اقدامات کی کمی، اسرائیل کو شہریوں کے قتل عام، گھروں پر چھاپوں، املاک کی تباہی اور بستیوں کے پھیلاؤ جیسے اقدامات پر اُکساتی ہے۔

وزارتِ خارجہ فلسطین نے زور دیا کہ عالمی برادری اسرائیلی جرائم اور جارحیت کو روکنے کے لیے سنجیدہ اقدامات کرے اور ایک حقیقی سیاسی راستہ اختیار کیا جائے تاکہ اقوامِ متحدہ اور دیگر اداروں کی جائز قراردادوں پر عمل درآمد ممکن ہو۔

بیان میں یہ بھی واضح کیا گیا کہ اسرائیل کے حالیہ اقدامات ایک خطرناک رجحان کی نشاندہی کرتے ہیں، جس کے ذریعے صیہونی ریاست مغربی کنارے پر اپنی غاصبانہ پالیسی مسلط کر رہی ہے۔ عالمی دباؤ اور عملی ردعمل کی عدم موجودگی تل ابیب کو مزید کھلی چھوٹ فراہم کر رہی ہے۔