روس نے دنیا کو قحط کے خطرہ سے دوچار کر دیا ہے:یورپی یونین

?️ 21 جون 2022

سچ خبریں:یورپی یونین کی خارجہ پالیسی کے سربراہ کا کنہا ہے کہ روس نے یوکرین اور اپنے ملک سے اناج کی برآمدات کو روک کر دنیا کو قحط کے خطرہ سے دوچار کر دیا ہے۔
یورپی یونین کی خارجہ پالیسی کے سربراہ جوزف بورل نے اپنے آفیشل بلاگ پر ایک کالم میں لکھا کہ ہم اقوام متحدہ کے ساتھ کام کرنے کے لیے تیار ہیں تاکہ ہمارے شرکاء عالمی فوڈ سکیورٹی کے خطرے کے اثرات سے بچ سکیں، جوزف بورل نے کہا کہ روس نے بحیرہ اسود کو ‘وار زون’ میں تبدیل کر دیا ہے اور یوکرین سے کھاد اور اناج کی ترسیل کو روک رہا ہے۔

یورپی یونین کی خارجہ پالیسی کے سربراہ کا کہنا تھا کہ روس اپنے اناج کی برآمدات پر ٹیکسز اور کوٹہ بھی عائد کر رہا ہے،جوزف بورل نے کہا کہ یورپی یونین کی جانب سےعائد پابندیاں روس کی زرعی مصنوعات کی برآمدات پر نہیں ہیں، انہوں نے کہا کہ یہ نہایت ضروری ہے کہ یوکرین کو جہاز کے ذریعے برآمدات کی اجازت دی جائے۔

جوزف بورل نے کہا کہ ہم اس مسئلے پر اقوام متحدہ کے ساتھ مل کر کام کر رہے ہیں، یورپی یونین اور اس کے رکن ممالک اس مسئلے کو حل کرنے کے لیے ضروری اقدامات کرنے کے لیے تیار ہیں۔