حماس کو غیر مسلح کرنا ریاض اور تل ابیب کا مشترکہ منصوبہ ہے 

حماس کو غیر مسلح کرنا ریاض اور تل ابیب کا مشترکہ منصوبہ ہے

لبنانی روزنامہ الاخبار کے مطابق، سعودی عرب اور اسرائیل غزہ کے مستقبل پر ایک جیسے مؤقف رکھتے ہیں اور دونوں کا مشترکہ ہدف حماس کو غیر مسلح کرنا ہے۔

رپورٹ کے مطابق، سعودی وزارتِ خارجہ نے ستمبر کے آخر میں ایک دستاویز بعنوان "غزہ اور مغربی کنارے میں امن و استحکام کے حصول کے لیے سعودی وژن” جاری کی، جو جنگِ غزہ کے بعد کے مرحلے کے لیے ریاض کا خاکہ پیش کرتی ہے۔

اخبار لکھتا ہے کہ یہ منصوبہ فتح تحریک کے کردار کو مضبوط اور حماس کے اثر و رسوخ کو بتدریج کم کرنے پر مبنی ہے۔ اس مقصد کے لیے مصر اور اردن کے ساتھ تعاون بڑھانے اور غزہ میں بین الاقوامی امن فوج کی تعیناتی کی حمایت پر زور دیا گیا ہے۔

الاخبار کے مطابق، یہ منصوبہ بظاہر اسرائیلی وزیراعظم بنیامین نیتن یاہو کے منصوبے سے مشابہ ہے، تاہم فرق یہ ہے کہ نیتن یاہو حماس کے مکمل خاتمے پر زور دیتا ہے جبکہ سعودی عرب اسے بتدریج غیر فعال کرنے کا خواہاں ہے۔

رپورٹ میں مزید کہا گیا ہے کہ دونوں فریقین حماس کو غیر مسلح کرنے پر متفق ہیں — اسرائیل مکمل فوجی انخلا چاہتا ہے جبکہ سعودی عرب اس عمل کو علاقائی اور بین الاقوامی معاہدوں کے تحت انجام دینا چاہتا ہے۔

الاخبار نے نشاندہی کی کہ سعودی منصوبے میں اقوام متحدہ کے ادارے اونروا (UNRWA) کا ذکر نہیں کیا گیا، بلکہ اس کی جگہ عالمی امداد کے متبادل چینلز کے قیام پر زور دیا گیا ہے، جو نیتن یاہو کے مؤقف سے مطابقت رکھتا ہے۔

دونوں ہی ریاض اور تل ابیب غزہ میں عرب ممالک کے کردار کو اہم سمجھتے ہیں۔ نیتن یاہو تجربہ کار عرب ریاستوں کے تعاون کی بات کرتا ہے جبکہ سعودی عرب خاص طور پر مصر اور اردن کے کردار کو کلیدی قرار دیتا ہے۔

تاہم، دونوں کے درمیان دو بنیادی اختلافات باقی ہیں:اول  سعودی عرب ایک آزاد فلسطینی ریاست کے قیام کا حامی ہے جس کی بنیاد 1967ء کی سرحدوں اور مشرقی بیت المقدس کو دارالحکومت بنانے پر ہو؛دوم  ریاض چاہتا ہے کہ فلسطینی اتھارٹی غزہ میں انتظام سنبھالے، جب کہ اسرائیل اس کی مخالفت کرتا ہے۔

یاد رہے کہ گزشتہ ہفتے حماس نے جنگِ غزہ کے اختتام اور قیدیوں کے تبادلے کے معاہدے کا اعلان کیا تھا، تاہم اسرائیل اب بھی جنگ بندی کی شرائط کی خلاف ورزیوں کا مرتکب ہو رہا ہے۔