سچ خبریں:فلسطینی مجاہدین اور صیہونی فوجیوں کے درمیان مسلح تصادم کے نتیجہ میں 2 فلسطینی شہید ہوگئے جبکہ ایک صیہونی افسر بھی ہلاک ہوا۔
الجزیرہ چینل کی رپورٹ کے مطابق میڈیا ذرائع نے جنین میں جلمہ کراسنگ پر فلسطینی عسکریت پسندوں اور صہیونی فوجیوں کے درمیان مسلح تصادم کے واقعات کی اطلاع دی ہے، اس رپورٹ کے مطابق اس تنازع کے بعد دونوں فریقوں نے ایک دوسرے پر بڑے پیمانے پر فائرنگ کی۔
فلسطین کی وزارت صحت نے اعلان کیا کہ مذکورہ تنازعے کے دوران مزاحمتی مجاہدین میں سے دو احمد عابد اور عبدالرحمن عابد شہید ہوئے ہیں، نیز صیہونی فوج کے ترجمان نے مزاحمتی جنگجوؤں کے ساتھ جھڑپ میں اس حکومت کے ایک افسر کے مارے جانے کا اعلان کیا۔
دوسری جانب الاقصیٰ شہداء بٹالین نے ایک بیان میں اعلان کیا ہے کہ وہ جلمہ کراسنگ کے قریب صہیونی دشمن کی فوج کے ساتھ شدید مسلح تصادم میں شامل ہوئے اور انہیں شدید نقصان پہنچایا۔