جرمنی کا امریکا سے مزید 15 ایف-35 جنگی طیارے خریدنے کا منصوبہ

جرمنی کا امریکا سے مزید 15 ایف-35 جنگی طیارے خریدنے کا منصوبہ

جرمن ہفت روزہ اشپیگل نے پیر کے روز انکشاف کیا ہے کہ جرمنی کے وزیرِ دفاع بوریس پیستوریوس امریکا کی دفاعی کمپنی لاک ہیڈ مارٹن سے مزید 15 جدید ایف-35 جنگی طیارے خریدنے کا ارادہ رکھتے ہیں۔

رپورٹ کے مطابق، یہ فیصلہ پارلیمنٹ کی بجٹ کمیٹی کے لیے تیار کردہ ایک محرمانہ دستاویز میں شامل ہے، جس میں بتایا گیا ہے کہ اس منصوبے کی کل لاگت تقریباً 2.5 ارب یورو تقریباً 2.9 ارب ڈالر ہوگی۔

خبر رساں ادارے رائٹرز کے مطابق، برلن اس سے قبل 35 ایف-35 طیاروں کا آرڈر دے چکا ہے تاکہ انہیں پرانے ٹورنیڈو جنگی طیاروں کے متبادل کے طور پر شامل کیا جا سکے، جو جلد ہی فضائی بیڑے سے خارج کیے جانے والے ہیں۔

دلچسپ بات یہ ہے کہ جرمنی نے گزشتہ جولائی میں اضافی ایف-35 طیارے خریدنے کی تجویز مسترد کر دی تھی، تاہم اب دفاعی بجٹ میں نمایاں اضافہ ہونے کے بعد حکومت نے دوبارہ اس منصوبے پر غور شروع کر دیا ہے۔

اشپیگل کے مطابق، 15 اضافی طیاروں کی خریداری کا فیصلہ جرمنی اور فرانس کے درمیان کشیدگی بڑھا سکتا ہے، کیونکہ دونوں ممالک مشترکہ طور پر یورپی جنگی طیارہ پروگرام (FCAS) پر کام کر رہے ہیں، لیکن اس منصوبے پر اختلافات پہلے سے موجود ہیں۔

فوجی ماہرین کا کہنا ہے کہ نیٹو (NATO) کی نئی دفاعی حکمتِ عملی اور مضبوط فضائی صلاحیتوں کے اہداف کے تحت جرمنی کو مستقبل میں مزید جنگی طیاروں کی ضرورت بھی پیش آ سکتی ہے۔