تین ممالک، تین پیغامات؛ مودی کے اردن، ایتھوپیا اور عمان کے دورے کا سفارتی جائزہ

?️ 15 دسمبر 2025

تین ممالک، تین پیغامات؛ مودی کے اردن، ایتھوپیا اور عمان کے دورے کا سفارتی جائزہ

بھارتی وزیرِاعظم نریندر مودی اردن، ایتھوپیا اور عمان کے دورے پر روانہ ہو گئے ہیں۔ اس دورے کا مقصد دوطرفہ تعلقات کو مضبوط بنانا، علاقائی پیش رفت پر مشاورت کرنا اور عالمی جنوب کے ممالک کے ساتھ تعاون کو فروغ دینا ہے۔

خبر رساں ادارے ایشیا نیوز انٹرنیشنل نے رپورٹ کیا ہے کہ مودی کا یہ دورہ 15 سے 18 دسمبر (24 سے 27 آذر) تک جاری رہے گا۔ وہ اپنے دورے کے پہلے مرحلے میں اردن کے بادشاہ عبداللہ دوم بن الحسین کی دعوت پر 15 سے 16 دسمبر تک دارالحکومت عمان میں قیام کریں گے۔ اس دوران وہ اردن کی اعلیٰ قیادت سے ملاقاتوں میں بھارت–اردن تعلقات کے تمام پہلوؤں اور علاقائی صورتحال پر تبادلہ خیال کریں گے۔

یہ دورہ بھارت اور اردن کے درمیان سفارتی تعلقات کے قیام کی 75ویں سالگرہ کے موقع پر ہو رہا ہے، اور توقع ہے کہ اس سے دوطرفہ تعلقات کو نئی رفتار ملے گی۔ وزیرِاعظم مودی اردن میں مقیم بھارتی برادری سے بھی ملاقات کریں گے۔

روانگی سے قبل جاری بیان میں بھارتی وزیرِاعظم نے کہا کہ بھارت کے اردن، ایتھوپیا اور عمان کے ساتھ قدیم تہذیبی روابط اور مضبوط عصری تعلقات ہیں، اور یہ دورہ ان روابط کو مزید گہرا کرنے کا ایک اہم موقع فراہم کرے گا۔

دورے کے دوسرے مرحلے میں، مودی 16 سے 17 دسمبر تک پہلی مرتبہ ایتھوپیا کا دورہ کریں گے۔ دارالحکومت آدیس ابابا میں وہ وزیرِاعظم آبی احمد علی سے ملاقات کر کے دوطرفہ تعاون کے تمام شعبوں پر گفتگو کریں گے۔ آدیس ابابا افریقی یونین کا صدر دفتر بھی ہے، اس لیے اس دورے کو عالمی جنوب کے ممالک کے کردار کو مضبوط بنانے کے تناظر میں اہم قرار دیا جا رہا ہے۔

بھارتی وزیرِاعظم ایتھوپیا میں مقیم بھارتی برادری سے ملاقات کے علاوہ ملک کی پارلیمنٹ کے مشترکہ اجلاس سے خطاب بھی کریں گے۔ بھارتی وزارتِ خارجہ کے مطابق، یہ دورہ دہلی اور آدیس ابابا کے درمیان عالمی جنوب کے شراکت داروں کے طور پر تعاون بڑھانے کے مشترکہ عزم کی عکاسی کرتا ہے۔

دورے کے آخری مرحلے میں، نریندر مودی 17 سے 18 دسمبر تک عمان کے سلطان ہیثم بن طارق کی دعوت پر مسقط کا دورہ کریں گے۔ یہ مودی کا عمان کا دوسرا سرکاری دورہ ہوگا۔ اس موقع پر وہ سلطان عمان سے اسٹریٹجک شراکت داری کے فروغ اور تجارتی و اقتصادی تعلقات کی توسیع پر بات چیت کریں گے اور عمان میں مقیم بھارتی برادری سے بھی خطاب کریں گے۔

بھارتی وزارتِ خارجہ کے مطابق، بھارت اور عمان کے تعلقات جامع اسٹریٹجک شراکت داری اور تاریخی، تجارتی اور عوامی روابط پر مبنی ہیں۔ یہ دورہ دونوں ممالک کے درمیان سفارتی تعلقات کی 70ویں سالگرہ کے موقع پر ہو رہا ہے اور دسمبر 2023 میں سلطان عمان کے بھارت کے سرکاری دورے کا تسلسل ہے۔

دونوں فریق تجارت، سرمایہ کاری، توانائی، دفاع، سلامتی، ٹیکنالوجی، زراعت اور ثقافت سمیت مختلف شعبوں میں تعاون کے فروغ کے ساتھ ساتھ علاقائی اور عالمی امور پر بھی تبادلہ خیال کریں گے۔