سچ خبریں:صیہونی حکومت کے وزیراعظم نے ترکی اور اسرائیل کے درمیان فضائی رابطہ قائم کرنے کے معاہدے کی منظوری کا اعلان کیا۔
اسرائیلی وزیر اعظم یائرلاپڈ نے اپنے ٹویٹر اکاؤنٹ پر اعلان کیا کہ 15 سال بعد اسرائیلی ایئر لائنز ترکی کی فضائی حدود کو استعمال کریں گی، لاپڈ نے اس پیغام میں لکھا کہ کابینہ کے اجلاس میں ہم نے ترکی اور اسرائیل کے درمیان فضائی رابطہ قائم کرنے کے معاہدے کی منظوری دے دی ہے۔
انہوں نے لکھا کہ اب سے اسرائیل استنبول کے ساتھ ساتھ ترکی کے دیگر شہروں کی فضائی حدود بھی استعمال کر سکتا ہے، ایسا لگتا ہے کہ یہ کارروائی بھی انقرہ اور تل ابیب کے درمیان تعلقات کو معمول پر لانے کے منصوبے کا حصہ ہے۔
واضح رہے کہ صیہونی حکومت کے اسٹریٹجک اینڈ سیکورٹی اسٹڈیز کے انسٹی ٹیوٹ نے حال ہی میں اپنی نئی رپورٹ میں تل ابیب اور انقرہ میں سفیر تعینات کرنے کے سلسلے میں ترکی اور صیہونی حکومت کے اقدام اور رجب طیب اردگان کے عنقریب مقبوضہ علاقوں کا دورہ کا ذکر کیا ہے، ان کا کہنا ہے کہ یہ دورہ ترکی اور اسرائیل کے درمیان تعلقات کو معمول پر لانے اور دوطرفہ تعلقات کی ترقی کی جانب ایک قدم ہے۔
یاد رہے کہ چند روز قبل صیہونی حکومت کے کان چینل نے خبر دی تھی کہ 12 سال بعد ترک بحریہ کا ایک جنگی بحری جہاز عملے کے تقریباً 200 ارکان پر مشتمل نیٹو کے سمندری گشتی مشن کے حصہ کے طور پر حیفا کی بندرگاہ پر پہنچا ہے۔
