کبھی بھی اداکارہ بننا نہیں چاہتی تھی، طوبیٰ انور کا خود سے متعلق انکشاف

?️ 28 جولائی 2025

کراچی: (سچ خبریں) ماڈل و اداکارہ طوبیٰ انور نے انکشاف کیا ہے کہ وہ کبھی بھی اداکارہ نہیں بننا چاہتی تھیں۔ طوبیٰ انور نے حال ہی میں حسن چوہدری کے پروگرام میں شرکت کی جہاں انہوں نے مختلف موضوعات پر کھل کر گفتگو کی۔

ایک سوال کے جواب میں انہوں نے بتایا کہ وہ کبھی بھی اداکارہ نہیں بننا چاہتی تھیں بلکہ وہ بڑے ہو کر فائن آرٹس کے میدان میں اپنا کیریئر بنانا چاہتی تھیں۔

طوبیٰ انور نے اپنے اداکاری کے سفر کے آغاز پر بات کرتے ہوئے بتایا کہ وہ کافی عرصے سے کیمرے کے پیچھے کام کر رہی تھیں، اسی دوران انہیں ’اے آر وائی‘ کی جانب سے آڈیشن کی پیشکش ہوئی جس میں وہ کامیاب رہیں اور یوں ان کے اداکاری کے سفر کا آغاز ہوا۔

انہوں نے کہا کہ انہوں نے اداکاری خود سیکھی اور اس میں ان کے ساتھی اداکاروں اور ہدایتکاروں کا اہم کردار رہا، کیونکہ انسان اپنے اردگرد کے ماحول سے بہت کچھ سیکھتا ہے۔

اداکارہ کے مطابق جب وہ فارغ وقت میں ڈرامے دیکھتی ہیں تو یہ سوچتی ہیں کہ اگر وہ یہ کردار ادا کرتیں تو کس انداز میں اداکاری کرتیں۔

ان کا یہ بھی کہنا تھا کہ پاکستانی ڈراموں کی کہانیاں کافی حد تک حقیقت کے قریب ہوتی ہیں، کبھی کبھار ایسا ہوتا ہے کہ کسی کہانی کو غیر ضروری طور پر طول دے دیا جاتا ہے، لیکن زیادہ تر جو کچھ ڈراموں میں دکھایا جاتا ہے ویسا ہی معاشرے میں ہوتا ہے۔

اداکارہ کے مطابق وقت کے ساتھ انہوں نے یہ بھی سیکھا ہے کہ اگر کسی ڈرامے کا معاوضہ ادا نہیں کیا جا رہا تو ایسے پروجیکٹ میں کام نہیں کرنا چاہیے، خاص طور پر جب تک مکمل ادائیگی نہ ہو جائے۔