بیجنگ کا واشنگٹن کو پیغام،تجارتی غنڈہ گردی کی پالیسیوں کو بند کریں

بیجنگ کا واشنگٹن کو پیغام،تجارتی غنڈہ گردی کی پالیسیوں کو بند کریں

 چین کے نمائندے نے عالمی تجارتی تنظیم (WTO) میں امریکہ کو کثیرالجہتی تجارتی نظام کو کمزور کرنے کا ذمہ دار قرار دیتے ہوئے مطالبہ کیا ہے کہ واشنگٹن بین الاقوامی تجارتی اصولوں اور اس تنظیم کے قوانین کی پابندی کرے۔

بھارتی خبر رساں ویب سائٹ فرسٹ پوسٹ کے مطابق، عالمی تجارتی تنظیم میں چین کے مشن کی جانب سے جاری بیان میں کہا گیا ہے کہ امریکہ مسلسل اپنے وعدوں کی خلاف ورزی کر رہا ہے اور اس کے اقدامات عالمی تجارتی نظام کے اعتبار کو نقصان پہنچا رہے ہیں۔ چین کے مطابق، واشنگٹن کی پالیسیاں عالمی تجارتی اصولوں کو مسخ کر رہی ہیں۔

یہ بیان چین کی وزارتِ تجارت کی سالانہ رپورٹ کے اجراء کے ساتھ سامنے آیا ہے، جس میں کہا گیا ہے کہ امریکہ تجارتی غنڈہ گردی، صنعتی پالیسیوں میں دوہرا معیار، اور بین الاقوامی اصولوں کی خلاف ورزی کے ذریعے عالمی تجارتی نظام کو کمزور کر رہا ہے۔

رپورٹ میں ۱۱ ایسے کلیدی شعبوں کی نشاندہی کی گئی ہے جہاں امریکی تجارتی طرزِعمل عالمی تجارتی تنظیم کے قوانین سے متصادم ہے۔ ان میں "امریکی مصنوعات خریدیں” (Buy American) پالیسی، غیر ملکی سرمایہ کاری پر پابندیاں، برآمدات پر کنٹرول، دانشورانہ املاک کے حقوق، امتیازی ٹیکس اور غیر تعرفہ جاتی رکاوٹیں، نیز صنعتی و زرعی سبسڈیز شامل ہیں۔

دستاویز میں مزید کہا گیا ہے کہ امریکہ اکثر عالمی تجارتی تنظیم کے تنازعات کے حل کے نظام کو نظرانداز کرتا ہے، یکطرفہ طور پر محصولات عائد کرتا ہے اور امتیازی تجارتی اقدامات اختیار کرتا ہے۔ چین نے اس رپورٹ کے ذریعے عالمی برادری کو امریکہ کے غیر منصفانہ رویے سے آگاہ کرنے کی کوشش کی ہے۔

یہ تیسری رپورٹ ہے جو چین کی وزارتِ تجارت نے ۲۰۲۳ کے بعد سے جاری کی ہے، جس میں امریکہ کی جانب سے عالمی تجارتی تنظیم کے قوانین کی پاسداری کا تفصیلی جائزہ پیش کیا گیا ہے۔