سچ خبریں:اسرائیلی وزارت جنگ نے بحرین کے ساتھ سکیورٹی تعاون کے معاہدے پر دستخط کرنے کا اعلان کیا۔
المیادین چینل کی رپورٹ کے مطابق اسرائیلی وزارت جنگ نے اعلان کیا کہ اسرائیل اور بحرین نے سکیورٹی تعاون کے معاہدے پر دستخط کر دیے ہیں،بحرین میں امریکی پانچویں بحری بیڑے کے دورے کے دوران بحرین کا دورہ کرنے والے اسرائیلی وزیر جنگ بنی گانٹز نے کہا کہ ہمارے طیارے کا یہاں اترنا ایک بہت اہم پیغام ہے۔
انہوں نے مزید کہاکہ ہم خطے کی سلامتی کے لیے کچھ اہم دفاعی امور کے بارے میں عوامی سطح پر بات کرنے والے ہیں،یادرہے کہ اسرائیلی وزیر جنگ بدھ کو سرکاری دورے پر بحرین کے دارالحکومت منامہ پہنچے، یہ دورہ ایسے وقت میں کیا گیا ہے جبکہ انٹیلی جنس آن لائن ویب سائٹ نے حال ہی میں اطلاع دی تھی کہ بحرین کے شاہ حمد بن عیسیٰ آل خلیفہ نے اپنے ملک کی انٹیلی جنس سروس کو دو طرفہ سمجھوتے کے معاہدے کے تحت اسرائیل کی انٹیلی جنس سروسز کے ساتھ تعاون کو مضبوط اور وسعت دینے کی ہدایت کی ہے۔
یادرہے کہ گزشتہ ماہ کے وسط میں بحرین کے وزیر داخلہ راشد بن عبداللہ آل خلیفہ نے اسرائیلی وزیر داخلہ عمیر بریلیف سے ملاقات اور مشاورت کی، بحرین کے ولی عہد شہزادہ سلمان بن حمد آل خلیفہ اور صیہونی حکومت کے وزیراعظم نفتالی بینیٹ نے بھی 3 نومبر کو ملاقات کی، یہ پہلا موقع تھا کہ بحرین اور صیہونی حکومت کے درمیان تعلقات کو معمول پر لانے کے معاہدے پر دستخط کے بعد فریقین کے درمیان اس سطح پر کوئی ملاقات ہوئی۔
