بحرینی قیدیوں کی حالت زار پر انسانی حقوق کی تنظیموں کی رپورٹ

?️ 15 جنوری 2023

سچ خبریں:انسانی حقوق کی تنظیموں نے بحرین میں انسانی حقوق کے سیاہ ریکارڈ پر زور دیتے ہوئے آل خلیفہ کی جیلوں میں سیاسی قیدیوں کی حالت زار پر روشنی ڈالی۔

الخلیفہ کی جیلوں میں سیاسی قیدیوں کی تکالیف کا سلسلہ ان پابندیوں کے نتیجے میں جاری ہے جس میں طبی غفلت اور ان کے بنیادی حقوق سے محرومی بھی شامل ہے، گزشتہ ایک دہائی کے دوران آل خلیفہ کی جیلوں کی مخدوش حالت کے بارے میں کئی رپورٹیں شائع ہوئی ہیں، اس کی وجہ سے بین الاقوامی برادری اور انسانی حقوق کی تنظیموں کی جانب سے جیلوں کے حالات بہتر کرنے اور سیاسی قیدیوں کے ساتھ تشدد اور ناروا سلوک بند کرنے کی درخواست کی گئی ہے۔

بحرین کے 162 سیاسی قیدیوں نے "جو” سنٹرل جیل کے ڈائریکٹر کے توسط سے اس ملک کے حکام کو لکھے گئے ایک خط میں آل خلیفہ کی جیلوں کے ابتر حالات کی شکایت کی اور ان جیلوں میں انسانی حالات فراہم کرنے کا مطالبہ کیا،قیدیوں کی درخواستوں میں مناسب صحت کی دیکھ بھال، مذہبی رسومات ادا کرنے، اپنے اہل خانہ کے ساتھ ملاقات کی اجازت اور اذیت کو کم کرنے نیز قید تنہائی کو ختم کرنے کی درخواستیں تھیں۔

واضح رہے کہ بحرینی حکام سیاسی قیدیوں کو مختلف قسم کے تشدد کا نشانہ بناتے ہیں، جیسے کہ 10 اگست 2022 کو 14 قیدیوں کی جبری گمشدگی جو ان کے اہل خانہ کی جانب سے ان کے بارے میں معلومات حاصل کرنے کی شدید کوششوں کے باوجود لاپتہ ہیں،انسانی حقوق کے کارکن ابتسام الصائغ نے کہا کہ ملٹیپل سکلیروسیس میں مبتلا بحرین کے قیدیوں کی جسمانی حالت علاج کی کمی کی وجہ سے بہت سنگین ہے، انہیں اکثر ہسپتالوں میں دیکھ بھال کی ضرورت ہوتی ہے جبکہ ان میں سے بعض بغیر کسی علاج کے کئی ہفتے جیل میں گزارتے ہیں۔

یاد رہے کہ اپنے حقوق کے حصول کے لیے آل خلیفہ کی جیلوں میں قیدی وقتاً فوقتاً بھوک ہڑتال کرتے رہتے ہیں ، ان کے مطالبات میں سے ایک فزیوتھراپی خدمات کا استعمال بھی ہے جس کے لیے انہیں جیل انتظامیہ کی جانب سے صرف جھوٹے وعدے اور تاخیر ہی حاصل ہوتی ہے نیز بہت سے بحرین کے سیاسی قیدی اپنی تعلیم مکمل کرنے کے حق سے محروم ہیں جبکہ "جو” جیل کے قیدی نامناسب کھانے کی شکایت بھی کرتے ہیں۔

دوسری جانب ہیومن رائٹس واچ نے 2023 کی اپنی انسانی حقوق کی رپورٹ شائع کی، جس میں اس نے بحرین میں انسانی حقوق کے بحران میں مسلسل اضافے، سیاسی آزادیوں اور آزادی اظہار رائے کے فقدان نیز سیاسی قیدیوں کو ان کے بنیادی حقوق سے محروم کرنے کی تصدیق کی ہے۔