امریکہ کا افغانستان کے منجمد اثاثے جاری نہ کرنے کا اعلان

?️ 16 اگست 2022

سچ خبریں:امریکی ذرائع ابلاغ کا کہنا ہے کہ واشنگٹن افغانستان کے ضبط کیے گئے اثاثے جاری نہیں کرے گا اور اس سلسلے میں طالبان کے ساتھ مذاکرات بھی روک دیے گئے ہیں۔
امریکی حکام نے اعلان کیا کہ کابل میں امریکی فضائی حملے میں القاعدہ رہنما ایمن الظواہری کی ہلاکت کے بعد واشنگٹن افغانستان کے مرکزی بینک کے ضبط شدہ اثاثے جاری نہیں کرے گا اور اس سلسلہ میں طالبان کے ساتھ مذاکرات بھی روک دیے ہیں۔

افغانستان کے لیے امریکہ کے خصوصی نمائندے ٹام ویسٹ نے اس بارے میں وال اسٹریٹ جرنل کو بتایا کہ ہمیں یقین نہیں ہے کہ افغانستان کا مرکزی بینک اثاثوں کے ذمہ دارانہ انتظام کے لیے حفاظت اور نگرانی کرنے کی صلاحیت رکھتا ہے، انہوں نے مزید کہا کہ یہ کہنے کی ضرورت نہیں کہ طالبان کی جانب سے القاعدہ کے رہنما ایمن الظواہری کو پناہ دینا دہشت گرد گروہوں کو مالی وسائل کی منتقلی کے بارے میں ہماری گہری تشویش کو تقویت دیتا ہے۔

امریکی اخبار نے وائٹ ہاؤس کے حکام کا حوالہ دیتے ہوئے لکھا ہے کہ بائیڈن انتظامیہ بین الاقوامی ٹرسٹ فنڈ کے قیام کے بارے میں دیگر بیرونی ممالک کے حکام سے مشاورت کر رہی ہے تاکہ ضبط کیے گئے اثاثوں کا نصف افغان عوام کے فائدے کے لیے استعمال کیا جا سکے،انہوں نے مزید کہا کہ اس فنڈ کے قیام کے لیے پیش رفت ہوئی تھی لیکن طالبان کی جانب سے دوحہ معاہدے کی خلاف ورزی نے واضح کر دیا کہ ان کے ساتھ کھلی آنکھوں سے نمٹا جانا چاہیے، تاہم طالبان کی عبوری حکومت نے ابھی تک اس پر کوئی تبصرہ نہیں کیا ہے۔