غزہ میں صیہونی فوج کا فلسطینیوں کو انسانی ڈھال بنانے کا لرزہ خیز انکشاف

سچ خبریں:امریکی اور مغربی میڈیا نے انکشاف کیا ہے کہ اسرائیلی فوج غزہ میں فلسطینی شہریوں، حتیٰ کہ بچوں کو بھی پروٹوکول کے تحت انسانی ڈھال کے طور پر استعمال کرتی رہی، یہ انکشافات انسانی حقوق کے عالمی اداروں اور سیاسی حلقوں میں شدید غم و غصے کا باعث بنے ہیں۔ 

حالیہ مغربی اور امریکی میڈیا رپورٹس کے مطابق، اسرائیلی فوج نے غزہ اور مغربی کنارے میں اپنی فوجی کارروائیوں کے دوران فلسطینی شہریوں، حتیٰ کہ کمسن بچوں تک کو انسانی ڈھال کے طور پر استعمال کیا ہے،یہ انکشاف امریکی چینل سی بی ایس کی تحقیقی رپورٹ اور دیگر مغربی ذرائع ابلاغ میں سامنے آیا ہے، جس کے بعد عالمی سطح پر شدید ردعمل سامنے آیا ہے۔

یہ بھی پڑھیں:صیہونیوں کی فلسطینیوں کے خلاف ایک اور مکروہ حقیقت منظر عام پر

ذرائع کے مطابق، اسرائیلی فوجیوں نے اعتراف کیا ہے کہ انہیں اپنے کمانڈروں کی جانب سے واضح احکامات ملے تھے کہ مشکوک گھروں اور سرنگوں میں داخل ہونے سے قبل فلسطینی قیدیوں اور عام شہریوں کو آگے کر کے راستہ صاف کیا جائے،اس خطرناک حکمت عملی کو اسرائیلی فوج میں پروٹوکول ‘ کہا جاتا ہے، جس کے ذریعے فلسطینیوں کو ایسے خطرناک مشن پر مجبور کیا جاتا ہے جن سے اسرائیلی فوجی خود گریز کرتے ہیں۔

اس پالیسی کی ہولناک ترین مثال وہ ہے جب اسرائیلی فوج نے دس سالہ فلسطینی بچے عمری سالم اور اس کے نو سالہ کزن کو ایک بم سے مشکوک عمارت میں داخل ہونے پر مجبور کیا۔ رپورٹ کے مطابق، جب بچوں نے انکار کیا تو ان پر تشدد کیا گیا اور اسلحے کے زور پر انہیں اندر بھیجا گیا،امریکی خبر رساں ادارے ایسوسی ایٹڈ پریس کے مطابق، اسرائیلی فوج نے غزہ اور مغربی کنارے دونوں علاقوں میں متعدد مرتبہ فلسطینی شہریوں کو اس طرح استعمال کیا،بعض اسرائیلی فوجیوں نے بھی اس بات کی تصدیق کی ہے کہ ان پالیسیوں کا مقصد فوج کی جان اور وسائل کی حفاظت ہے، جب کہ ان اقدامات سے سینکڑوں فلسطینیوں کی جانیں خطرے میں ڈال دی جاتی ہیں۔

اس لرزہ خیز انکشاف کے بعد دنیا بھر میں انسانی حقوق کے اداروں، سیاسی و سماجی حلقوں میں شدید غم و غصہ پایا جاتا ہے،امریکی تجزیہ کار اووِن جونز کا کہنا ہے کہ اسرائیلی فوج کے یہ اعترافات عالمی سطح پر ایک سنگین انسانی حقوق کی خلاف ورزی کے مترادف ہیں،سوشل میڈیا پر بھی مغربی میڈیا کی جانب سے ایسے انکشافات پر تاخیر پر تنقید کی جا رہی ہے اور مطالبہ کیا جا رہا ہے کہ اسرائیل کو جوابدہ بنایا جائے۔

برطانوی مصنف اور تجزیہ کار کرس ڈوئل کے مطابق، اسرائیلی فوج کی جانب سے انسانی ڈھال بنانے کی کئی وجوہات ہو سکتی ہیں، لیکن مغربی حکومتیں اس پر کھل کر مذمت کرنے سے گریزاں رہی ہیں۔

رپورٹ کے مطابق، متعدد اسرائیلی فوجیوں نے انکشاف کیا کہ انہیں اس پالیسی پر مکمل علم تھا اور کئی مواقع پر ہر گروہ ایک فلسطینی کو انسانی ڈھال کے طور پر استعمال کرتا رہا،یہاں تک کہ ان فلسطینی قیدیوں کے لیے توہین آمیز اصطلاحات جیسے(مچھر) استعمال کی جاتی تھیں،ان فوجیوں نے کہا کہ اس پالیسی کا مقصد فوجیوں اور ملٹری ڈاگز کی حفاظت اور فوجی کارروائیوں کو تیز کرنا تھا۔

مزید پڑھیں:صیہونی فوج کا فلسطینیوں کو انسانی ڈھال بنانے کا اعتراف

فلسطینی تنظیم حماس نے اپنے بیان میں ان انکشافات کو اسرائیلی فوج کی باقاعدہ پالیسی قرار دیتے ہوئے کہا کہ یہ فرداً فرداً واقعات نہیں بلکہ ریاستی سطح پر ایک منظم اور منسوب حکمت عملی ہے، جو اسرائیلی فوج کی اخلاقی تباہی کی علامت ہے،حماس اور انسانی حقوق کے گروپوں نے اقوام متحدہ، عالمی برادری اور بین الاقوامی اداروں سے مطالبہ کیا ہے کہ وہ ان جنگی جرائم کو رکوانے، ملوث افراد کو انصاف کے کٹہرے میں لانے اور اسرائیل کے خلاف عملی اقدامات کرنے کے لیے فوری مداخلت کریں،انہوں نے عالمی خاموشی اور ناکامی کو ان مظالم کے تسلسل کی ایک بڑی وجہ قرار دیا ہے۔