لڑکوں کی لڑکیوں سے حد سے زیادہ توقعات بھی تعلقات ٹوٹنے کا ایک سبب ہیں، احسن خان

?️ 8 جولائی 2025

کراچی: (سچ خبریں) معروف اداکار احسن خان کا کہنا ہے کہ ان کے خیال میں مرد و خواتین کو محبت میں ایک دوسرے سے حد سے زیادہ توقعات کی وجہ سے بھی خرابیاں پیدا ہو رہی ہیں جب کہ لڑکوں کی بلاوجہ لڑکیوں سے توقعات بھی رشتے ٹوٹنے کا ایک سبب ہیں۔

احسن خان نے حال ہی میں ’فوچیا میگزین‘ کو انٹرویو دیا، جس میں انہوں نے شوبز کیریئر سمیت دیگر معاملات پر کھل کر بات کی۔

پروگرام کے دوران انہوں نے بات کرتے ہوئے کہا کہ ان کے خیال میں آج کل کے والدین اپنے بیٹوں کی درست تربیت نہیں کرتے یا ان کی تربیت پر توجہ نہیں دی جاتی۔

ان کا کہنا تھا کہ ان کے والدین نے بھی انہیں ہر چیز نہیں سکھائی، انہوں نے خود گزرتے وقت اور زندگی سے بہت کچھ سیکھا۔

ان کے مطابق ہمارے سماج میں لڑکیوں کے لیے زیادہ مسائل ہوتے ہیں، شادی کے بعد لڑکی کو دوسرے گھر جانا ہوتا ہے،جہاں کا ماحول بالکل مختلف ہوتا ہے۔

احسن خان نے کہا کہ لڑکا صرف شادی کرکے لڑکی کو گھر لے آتا ہے، جہاں لڑکی تمام نئے افراد سے ملتی ہیں، اس لیے ان کے لیے مسائل زیادہ ہوتے ہیں۔

اداکار نے لڑکیوں اور خواتین کی خود مختاری پر بات کرتے ہوئے کہا کہ افسوس ہے کہ پاکستانی سماج میں لوگ اپنی بیٹیوں پر سرمایہ کاری نہیں کر رہے، انہیں مضبوط نہیں بنا رہے۔

ان کا کہنا تھا کہ ہمیں چاہیے کہ ہم لڑکیوں کا اتنا مضبوط بنائیں کہ انہیں کسی سہارے کی ضرورت نہ پڑے، وہ تمام کام خود کریں۔

انہوں نے مثال دی کہ اگر کسی خاتون کی شادی ختم ہوجاتی ہے یا کسی کے شوہر کا انتقال ہوجاتا ہے تو ایسی خاتون سہارا چلے جانے کے بعد کچھ نہیں کر سکتی، کیوں کہ اسے کسی چیز کا پتا ہی نہیں ہوتا۔

احسن خان نے کہا کہ ہمیں لڑکیوں کو شعور، تعلیم اور خود مختاری دینے کی ضرورت ہے، آزادی کا یہ مطلب نہیں کہ لڑکیاں اپنے سماجی اقدار، مذہب اور روایات سے آزاد ہوں گی۔

ایک سوال کے جواب میں انہوں نے تعلقات کے حوالے سے بھی بات کی اور کہا کہ محبت وقت مانگتی ہے، ایک نظر میں ہوجانے والی محبت نہیں ہوتی، وہ وقتی جذبہ ہوتا ہے۔

ان کے مطابق ایک دوسرے کو جان کر ایک دوسرے کو اپنانا ہی محبت ہوتی ہے اور ایک ساتھ ہر حوالے سے بہتر ہونا ہی اصل محبت کہلاتی ہے۔

انہوں نے کہا کہ انہوں نے چھوٹی چھوٹی باتوں پر بہت سارے رشتے ٹوٹتے دیکھے اور ایسے رشتے محض ایک دوسرے سے زیادہ توقعات رکھنے سے ہی ٹوٹ رہے ہیں۔

احسن خان کے مطابق محبت میں ایک دوسرے سے حد سے توقعات رکھنا بھی رشتوں کو کمزور کرنے کا سبب ہے۔ انہوں نے بتایا کہ بہت سارے لڑکے بھی لڑکیوں سے حد سے زیادہ توقعات رکھتے ہیں، وہ ہمیشہ خوابوں میں دیکھی جانے والی لڑکی چاہتے ہیں اور توقعات پوری نہ ہونے پر رشتے ٹوٹ جاتے ہیں۔