عامر خان اور ان کی اہلیہ طلاق کے بعد ایک بار پھر ساتھ نظر آئے

🗓️ 28 نومبر 2021

ممبئی (سچ خبریں) بالی ووڈ اداکار عامر خان اور ان کی اہلیہ کرن راؤ رواں سال طلاق کے ذریعے علیحدہ ہوگئے تھے تاہم  ایک بار پھر ایک ساتھ منظرِ عام پر آگئے۔ عامر خان اور کرن راؤ اپنے بیٹے آزاد راؤ خان کے فٹبال میچ میں بیٹے کو سپورٹ کرنے کے لیے ایک ساتھ شریک ہوئے۔

بھارتی میڈیا رپورٹس کے مطابق عامر خان اور کرن راؤ گزشتہ روز اپنے بیٹے آزاد راؤ خان کو خوش کرنے کے لیے ایک ساتھ نظر آئے، جوڑے کے درمیان طلاق ہوگئی ہے لیکن وہ اپنے بیٹے کے والدین کے طور پر متحد ہیں۔

میڈیا رپورٹس میں بتایا گیا کہ عامر خان اور کرن راؤ اپنے بیٹے آزاد راؤ خان کے فٹبال میچ میں بیٹے کو سپورٹ کرنے کے لیے ایک ساتھ شریک ہوئے۔فٹبال میچ کے بعد لی گئی تصویر بھارتی میڈیا پر وائرل ہورہی ہے جس میں عامر خان اور کرن راؤ کو اپنے بیٹے آزاد راؤ خان کے ساتھ دیکھا جاسکتا ہے۔

خیال رہے کہ بالی ووڈ اسٹار عامر خان نے اہلیہ کرن راؤ سے 15 برس تک رشتۂ ازدواج میں منسلک رہنے کے بعد رواں سال باضابطہ طور پر طلاق کا اعلان کیا تھا۔عامر خان اور کرن راؤ 28 دسمبر 2005 کو شادی کے بندھن میں بندھے تھے، ان کے ہاں 2011 میں بیٹے آزاد راؤ خان کی پیدائش ہوئی تھی۔

تاہم بعد ازاں دونوں نے طلاق سے متعلق مشترکہ بیان جاری کیا تھا جس میں انہوں نے اپنے چاہنے والوں کو بتایا تھا کہ ان کی شادی اختتام پذیر ہوگئی ہے، لیکن اسے ایک نئے سفر کے طور پر دیکھا جائے۔